Kongra Star li bajarên Hesekê, Til Temir, Şedadê û Dirbêsiyê yên kantona Cizîrê li dijî qetilkirina jina ciwan Şêrîn Osê ya li bajarê Cindirêsê ya Efrînê daxuyanî dan.
HESEKÊ
Daxuyanî li pêşiya avahiya Kongra Star a li taxa Nasira ya bajarê Hesekê bi amadebûna endam û nûnerên rêxistinênan jinan, saziyên civaka sivîl û komînan hat dayîn.
Endama Meclisa Kongra Star a bajarê Hesekê Beyan Osman daxuyanî xwend. Di daxuyaniyê de hate diyarkirin ku qetilkirina Şêrîn Osê ne bûyereke ferdî ye, lê belê berdewama zor, êşkence û zulma malbatî ya li ser jinan e. Her wiha hate destnîşankirin ku ev sûc encama tundiya bi salane ye û hewldanên berevajîkirina rastiyan û bi hinceta “namûsê” ye.
Di daxuyaniyê de hewldanên rewakirina sûcê bi rêya lihevhatinên eşîrtî hat redkirin, her wiha banga hesabpirsîna vê sûcê û şandina cenaze ji bo tiba edlî hat kirin. Bang li rêxistinên hiqûqî û navneteweyî hat kirin ku lêkolînê bişopîne û zextê bikin bila qanûnên parastina jinan bên mîsogerkirin.
Di dawiya daxuyaniyê de dirûşmên “Jin jiyan e, jiyanê nekujin” û “Na ji qetilkirina jinan re” hatin berzkirin.
TIL TEMIR
Endamên Kongra Star, saziyên civaka sivîl û nûnerên partiyên siyasî û jinên bajar li Parka Meclisa Malbatên Şehîdan kom bûn û daxuyaniyek da.
Rêvebera Kongra Star Sena El Samir bi zimanê erebî û endama meclisa bajarê Nalîn Seydo bi zimanê kurdî daxuyanî xwend.
Di daxuyaniyê de qetilkirina Şêrîn hat şermezarkirin û hate gotin, tevî şopên lêdan û tundiyê li ser bedena wê hatin dîtin, lê tê îdiakirin ku dawî li jiyana xwe aniye.
Di dewama daxuyaniyê de hate destnîşankirin ku tunebûna edaletê li herêmên dagirkirî nahêle ku malbatê tevahî detayên bûyerê parve bike, ev jî dide xuyakirin ku sûcdar ji ceza difilitin. Di daxuyaniyê de banga destpêkirina lêkolîneke cidî û serbixwe hat kirin. Her wiha bang li civaka navneteweyî hat kirin ku hesab ji berpirsên binpêkirinên li dijî jinan bipirsin.
ŞEDADÊ
Li bajarê Şedadê jî bi beşdariya endamên sazî û komîteyan daxuyaniyek hat dayîn. Endama Kongra Star Menal El Ferec daxuyanî xwend.
Di daxuyaniyê de qetilkirina jinan hat şermezarkirin û hate diyarkirin ku qetilkirina Şêrîn Osê jî nîşana rewşeke biêş a domandina diyardeya zewicandina zarokan û tundiya li dijî jinan e.
Hate diyarkirin ku zewaca bi temenê biçûk binpêkirina mafên mirovan e, di heman demê de sûcek li dijî zarokan û rûmeta mirovahiyê ye.
Di daxuyaniyê de banga hesabpirsînê û parastina jin û zarokan hate kirin. Hate gotin, Kongra Star dê têkoşîna li dijî hemû cûreyên tundiyê biparêze.
DIRBÊSIYÊ
Li bajarê Dirbsiyê jî bi beşdariya jinên ji saziyên sivîl û meclisan daxuyaniyek hate dayîn.
Di daxuyaniyê de qetilkirina Şêrînê hat şermezarkirin û hate diyarkirin ku ev sûc trajedyaya mirovî ya li Efrînê, tundiya sîstematîk û bêdengiya civaka navneteweyî nîşan dide.
Di daxuyaniyê de hate destnîşankirin ku qetilkirina jinan divê bibe doza raya giştî û banga lêkolîn û hesabpirsînê hat kirin.
