Konseya Ewlehiya Neteweyî ya Bilind a Îranê agirbesta ku ji aliyê Serokê Dewletên Yekbûyî yen Emerîkayê (DYE) Donald Trump ve hatî îlankirin, fermî kir.
Konseyê diyar kir ku hêzên çekdarî yên Îranê ‘’bersiveke baş dane Zilma dijmin’’ û destnîşan kir ku ev yek li gel êrîşa duh bi şev ya li hemberî baregehên Emerîkayê yên li Qeterê û êrîşên moşekan ên vê sibêhê yên li dijî Îsraîlê gihiştiye asta herî bilind.
Konseyê diyar kir ku Tehranê bi awayekî guncav û baş bersiv daye êrîşên li ser xaka wê û qebûl kiriye ku ‘’berê dijmin daye poşmaniyê û têkçûyîn û êrîşkariya dijmin bi awayekî yekalî bi dawî bike.’’
Di daxuyaniyê ev yek hatin gotin: ‘’Hêzên çekdarî yên Komara Îslamî ya Îranê ku ji gotinên dijmin bawer nake û hemû caran tedbîrên xwe digire, amade ye ku li hemberî hemû binpêkirinên dijmin bersiveke bibiryar û pêxîmker bide.’’
ÎRANÊ ÊRÎŞA BI MOŞEKAN A LI HEMBERÎ ÎSRAÎLÊ RED KIR
Li gorî nûçeya ISNA’yê Îranê îdîayên ku Tehranê beriya niha li hemberî Îsraîlê êrîşeke bi moşekan pêk aniye, red kiriye.
Artêşa Îsraîlê di demên dawîn de ragihandibû ku wan ‘’du moşekên balîstîkî yên ji aliyê Îranê ve hatine avêtin, bê bandor kiriye.’’ Her du aliyan jî beriya vê yekê ragihandibûn ku wan agirbest qebûl kiriye.
Ev yek piştî daxuyaniya Wezîrê Parastinê yê Îsraîlê Katz ku Îran bi binpêkirina agirbestê sûcdar kiribû û li hemberî Îranê fermana ‘’êrîşên dijwar’’ dabû, derket holê.
