Lemkow Enqere rexne kir ku li gel biryarên ‘mafê hêviyê’ yên saziyên Ewropayê jî gavê neavêje û anî ziman ku Neteweyên Yekbûyî jî di vê demê de ji berpirsyariyê direve. Lemkow Lemkow diyar kir ku eger Tirkiye û saziyên navneteweyî bi berpirsyariya siyasî ranebin ne di pirsgirêka Kurd de hem jî di şerê din de yên li Rojhilata Navîn wê pêşketineke rasteqîn nebe.
NETEWEYÊN YEKBÛYÎ BI QASÎ TIRKIYEYÊ BI PIRSGIRÊK E
Lemkow bi bîr xist ku li gel biryarên ‘mafê hêviyê’ yên ku Dadgeha Mafên Mirovan a Ewropayê (DMME) û Konseya Ewropayê têkildarî Rêber Apo daye jî Tirkiye hîn bi şênberî neketiye nava liv û tevgerê, ev yek nayê qebûlkirin û destnîşan kir ku divê Rêber Apo tavilê bê berdan. Lemkow ragihand ku Neteweyên Yekbûyî avaniyeke welê ye ku gelekî giran dixebite, di heman demê de ji karên lobî û zextê re jî vekirî ye. Lemkow anî ziman ku pirsgirêk ne tenê dewleta Tirk e û axaftina xwe bi vî rengî dewam kir: “Zexteke têrker li Tirkiyeyê nehate kirin. Pirsgirêkeke cidî ye ku Neteweyên Yekbûyî nakeve nava liv û tevgerê, yan jî gelekî giran tevdigere. Me ev yek di dema dawî de di gelek mînakan de dît. Neteweyên Yekbûyî ji her cûre lobiyê re vekiriye û mixabin lobiyên ji bo mafên mirovan bi têra xwe xurt nînin.”
GAVA DESTPÊKÊ DIVÊ GIRTÎ BE
Prof. Lemkow Enqere rexne kir ku li gel banga aştî û civaka demokratîk a Rêber Apo û çekdanîna PKK’ê jî gaveke şênber neavêtiye û destnîşan kir ku ji bo pêvajoya aştiyê bi pêş ve biçe divê dewleta Tirk jî gavê biavêje. Lemkow got, “Hewldana Ocalan a ji bo aştiyê gelekî bi wate û girîng e. Biryarên bi vî rengî gelekî zehmet in. Di heman demê de gaveke ku ber bi pêş ve tê avêtin. Me li Îrlanda û Herêma Baskê jî tecrûbeyên bi heman rengî dît û van gavan rê li ber guherînên girîng vekirin, ji bo aştiyê firsend afirandin. Em dixwazin ji niha û pê ve ji aliyê Tirk gavên şênber bibînin. Ev yek hîn nebûye, lê belê gava destpêkê ya divê bê avêtin di serî de Ocalan berdana girtiyên siyasî ye.”
GAVÊN ERÊNÎ WÊ BANDORÊ LI SERANSERÊ HERÊMÊ BIKE
Lemkow ragihand ku pêşketinek di navbera Tirk û Kurdan wê ne tenê li welêt her wiha bandorê li tevahiya Rojhilata Navîn bike û diyar kir ku li herêmeke ku şer diqewime, pêşketinek wê ji bo gelên din jî bibe hêvî û mînak.
PEYAMA JI BO RÊBER APO
Lemkow peyam ji Rêber Apo re şand û got, “Piştî ragirtina bi salan a li hucreya yek kesî bangeke bi vî rengî ya çekdanînê nîşaneya wêrekî û vîzyoneke mezin e. Ev yek di heman demê de nîşan dide ku sekna we ya têkildarî wekhevî û newekheviyê çiqasî girîng e. Karê we parçeyekî pêvajoya aştiyê ye. Ji ber vê yekê spasiya we dikim. Bêguman eger em rojekê karibin rû bi rû hevdu bibînin ev yek wê ji bo min bibe hevdîtineke awarte. Ya niha girîng berdana we û tevlîbûna we ya yekser li muzakereyan e.”
