Platforma Saziyên Demokratîk, bi wesîleya 1’ê Sibatê Roja Piştevaniya bi Rojava re ya Cîhanê, li Amedê meşek li dar xist. Meş li Parka Koşuyolu destpê kir û heta Ofis AZC Plaza dewam kir. Di meşê de dirûşmeyên li ser piştevaniya bi Rojava re û yekîtiya gelê Kurd hatin berzkirin. Di meşê de pankartên, “Rojava azadî û berxwedan e, nayê teslîmgirtin” û “Yek e yek e yek e, Kurdistan yek e”, “Min porên xwe kir kezî, dest bi berxwedanê dikim”, “Her kezîyek hêvî û azadiyê dihewîne” hatin hilgirtin.
‘EM Ê DESTÛRÊ NEDIN BÊSTATUBÛNÊ’
Meş bi tilîlî û dirûşmeyan li pêşiya AZC Plaza bi dawî bû.
Hevserokê Giştî yê DEM Partiyê Tuncer Bakirhan li vir axivî û diyar kir ku Şoreşa Rojava di encama têkoşîna li dijî DAÎŞ’ê de çêbûye û bilêv kir ku peymana di 30’ê Çileyê de bi saya berxwedana gelan pêkan bûye.
Bakirhan got, “Em ê nehêlin ku sedsaleke din jî bêyî ziman û bêyî statu bimîne.”
‘EM SPASIYA BIRÊZ OCALAN DIKIN’
Bakirhan diyar kir ku Rêber Apo pêşî li pevçûna Kurd-Ereb girtiye û Sûriyeyê ji şerê navxweyî rizgar kiriye û wiha got, “Em spasiya Birêz Ocalan dikin ku Sûriyeyê ji pevçûna Ereb û Kurd rizgar kir.”
Nûnerên civaka sivîl û jinan jî di çalakiyê de mafê axaftinê girtin. Di axaftinan de hate destnîşankiri ku Şoreşa Rojava bi pêşengiya jinan pêş ket û banga mezinkirin û parastina destkeftiyan kirin.
Endama TJA’yê Çaglar Demirel jî wiha got, “Rojava şoreşa jinan e, vê yekî jî Serok Ocalan pêk anî. Em ji bo vê peymanê jî spastiya Birêz Ocalan dikin.
Hevberdevkê Însiyatîfa Yekîtiya Demokratîk Mehmet Kamaç jî got, “Rojava, yekîtiya Kurdan pêk anî. Serê me bi te bilind e.”
