Newroza Amedê îro li Parka Newrozê ya li navçeya Baglar a Rezanê tê pîrozkirin.
Dika ji beton a berê ya li parkê hate hilweşandin û li şûna wê platformeke mezin hate danîn.
Platform bi pankartên ji dirûşmên Newrozê û dirûşma ‘Jin, Jiyan, Azadî’ hate xemilandin.
Her wiha ji bo bi sedan kesên ji derve hatin vexwendin, li cihekî cuda platformek hate amadekirin.
Wêneyekî mezin ê Kemal Korkût ku di Newroza Amedê ya 2017’an de hate qetilkirin hate daliqandin, pankartên ‘Me bi ciwantî destpê kir em ê bi ciwantî bi ser bikevin’, ‘Azadî wê bi ser bikeve’, ‘Yê ku nizane bi jinekê çawa biaxive nikare bibe sosyalîst’, ‘Pîvana min a bingehîn jiyaneke bi heybet a bi we re ye’ û ‘Azadî armanca gerdûnê ye’ yên Rêber Apo bal kişandin.
Ji bajar, navçe, bajarok û gundên derdorê jî bi hezaran kes ji bo tevlî pîrozbahiyê bibin bi rê ketin.
Li ber bendên kontrolê yên li Bûlwara Qamişloyê, Kolana Newrozê û Taxa Bagcilarê girseyên gel kom bûn.
Li ser her rêya ber bi qadê ve dirûşmên “Bijî Serok Apo” û “Jin, jiyan, azadî” olan didin. Piraniya girseyê ji ciwan û jinan pêk tê. Beşeke mezin a welatiyan cil û bergên Kurdî li xwe kirine. Gelek malbatan jî zarokên xwe jî bi xwe re anîne.
Li ser her rêya ber bi qada Newrozê ve diçe coşeke mezin heye. Hema hema li ser hemû cade û kolanan li ber dahol û zirneyê govend tê gerandin.
Ji 6 deriyan gel dikeve qadê. Li her derî jî bi hezaran kes di dorê de disekinin û li ber stranên Kurdî govendê digerînin.
Di pîrozbahiya Newrozê ya îsal a Amedê ji gelek welatan gelek kes hatin vexwendin. Ji Fransayê heta Katalonya, Spanya, Îrlanda, Belçîka, Almanya, Îtalya, Kenya, Çekya, Hindistan, Misir, Îran, Lubnan, Iraq, Lîbya, Tunus û Herêma Federe ya Kurdistanê bi sedan siyasetmedar, sendîkavan, nûnerên rêxistinên civaka sivîl û rojnameger ji bo pîrozbahiyê hatin vexwendin.
Di heman demê de ji bo şopandina pîrozbahiyan, hejmareke reko a rojnamegeran serlêdana akredîtasyonê kirin. Ji welêt û derveyî welat 629 rojnamegeran ji bo şopandina Newrozê akredîte bûn.
Têketina qadê didome û li bendê ye ku di demekî nêz de pîrozbahî dest pê bike.
Pîrozbahî wê bi rêzgirtinê dest pê bike. Piştre jî dê gel were silavkirin. Piştre jî li gorî dorê dê ji Tifaqa Kurdistanî Mehmet Kamaç, aktîvîsta TJA’yê Sebahat Tuncel, ji parêzerên Buroya Hiqûqê ya Asrinê Ozgur Faîk Erol, Hevseroka Giştî ya DBP’ê Çîgdem Kiliçgun Uçar û Hevserokê Giştî yê DEM Partiyê Tuncer Bakirhan biaxivin.
Di heman demê de dê Kemençe, Arhat, Grup Avna, Ayfer Duzdaş û Rewşan Çelîker derkevin ser dikê.
Mijara sereke ya Newroza îsal a Amedê jî banga dîrokî ya “Aştî û Civaka Demokratîk” a Rêber Apo ye ku di 27’ê Sibatê de hatibû ragihandin.
