‘Meşa Mezin a Azadiyê’ ku di 1’ê Sibatê de ji bo azadiya fîzîkî ya Rêberê Gelê Kurd Abdullah Ocalan dest pê kir, di roja 13’an de didome. Siyasetmedar û nûnerên rêxistinên demokratîk ên di meşa Wan û Qersê de cih digirtin li Amedê li hev civiyan.
Namzetên hevşaredariyê yên DEM Partiyê, Dayikên Aştiyê û nûnerên saziyên sivîl ji bo pêşwazîkirina meşvanan li ber Navenda Bazirganiyê ya Ceylanlar kom bûn. Gel bi stran, dirûşm û tilîliyan bi erbane li benda meşvanan bû. Dema ku şaxên Qers û Wan gihiştin ber AVM’ê ya Ceylanlar li ser astengkirina polîsan alozî derket.
Piştre jî meşvan bi çepik û dirûşman hatin pêşwazîkirin. Polîsên Tirk meşvan asteng kirin. Parlamenteran dest dan hev û li hemberî astengiya polîsan li ber xwe dan.
Hevserokê Giştî yê DBP’ê Keskîn Bayindir di çalakiyê de axivî û got, “Ev meş wê bigihêje armanca xwe. Me heta niha serî li ber zextên we netewand û ji niha û pê ve jî serî natewîne. Hûn nikarin gelê me bi polîtîkayên çewisandin û tirsandinê rawestînin. Em bi hezaran kes li vir in.”
Parlamentera DEM Partiyê Newroz Uysal jî got, “Ji bo me her kolana Amedê qada xwepêşandanê ye. Em ê kolan bi kolan bimeşin û armanca meşê vebêjin.”
Dayikên Aştiyê dorpêça li ber kargeha Ceylanê şikandin û tevlî meşê bûn. Dayikên laçikên spî li xwe kiribûn bi qurnefîlan meşvan pêşwazî kirin.
Dayikên Aştiyê dorpêça li pêşiya Ceylan AVM’ê derbas kirin û tev li meşvanan bûn. Dayikên laçikspî meşvan bi qurnefîlan pêşwazîkirin. Dayikan, li gel meşvanan stran gotin û coşa meşê hêj mezintir kirin. Di hevdîtinê de gelek caran dirûşmên “Bijî berxwedana Îmraliyê” û “Bijî berxwedana zindanan” hatin berzkirin. Gelek welatî jî li şaneşînên malên xwe tev li vê coşê bûn.
Piştî gefa “mudaxileyê” ya polîsan, parlamenteran rê ji trafîkê re girtin. Piştî rakirina dorpêçê jî meş dest pê kir.
Meşa ku li pêşiya AVM’a Ceylanê dest pêkir, heta navçeya Sûrê berdewam kir. Bi hezaran polîsan di tevahiya rêyê de çalakvan dorpêç kirin. Lê belê tevî vê yekê jî nekarîn coşa gel asteng bikin. Welatiyên di şaneşînên malên xwe de û li ser cadeyan jî meşvan silav kirin.
Li pişt Oryil Petrolê û semta Ofîsê bi sedan kesan meşvan bi dirûşma “Bijî Serok Apo” pêşwazî kirin. Gelemperiya girseyê ciwan bûûn. Tevî mudaxileya polîsan jî ciwanan li kolanan dirûşm berz kirin. Piştî meşa 4 saetan, meşvanan xwe gihandin Cadeya Gaziyê û piştre jî heta pêşiya Mînareya Çarling meşiyan.
LI BER MÎNAREYA ÇARLING DAXUYANÎ HAT DAYÎN
Piştî meşê parlamentera Partiya DEM Partiyê Newroz Uysal li ber Minareya Çarling axivî û got, “Em di zivistanê de ji Wan û Qersê derketin rê. Em ji bo azadiya Birêz Ocalan û çareseriya pirsgirêka Kurd hatin heta v¨derê. Ev rê rêya azadiya Birêz Ocalan e.”
Hevserokê Giştî yê DBP’ê Keskîn Bayindir jî wiha got: “Em îro bi hezaran kîlometre meşiyan û hatin Amedê. Gelê me di rê de piştgirî da me. Em spasiya wan hemûyan dikin. Me xwest pirsgirêka Kurd bi rêyên demokratîk çareser bibe. Muxatabê vê birêz Öcalan e. Ev sedsal in siyaseta înkar, asîmîlekirin û îmhayê li ser kurdan tê meşandin, lê nikarin vê pirsgirêkê çareser bikin. Îro bi hezaran polîs li vir kom kirine, wê tu encamê ji van polîtîkayan negirin. Ev meş û berxwedan ne yê 13 rojan e. 100 sal berê dest pê kiriye û ev berdewamiya wê ye. Pirsgirêkên li Kurdistan û Tirkiyeyê her ku diçe girantir dibin. Banga me ji her kesî re ew e ku rê û rêbazek ji bo çareseriya aştiyane ya vê pirsgirêkê bibînin. Kes bi vê pirsgirêkê re wê bigihêje tu derê. Çareseriya birûmet û aştiyane ya vê pirsgirêkê divê ne tenê li ser milê me be. Her kesên ku li vî welatî aştiyê dixwaze, divê berpirsyariya xwe bi cih bîne.”
Bayindirr di dawiya axaftina xwe de bal kişand ser têkoşîna 100 salan a Kurdan û wiha domand: “Ev sedsal bi berxwedana gelê Kurd hat roja îro. Rêberê vê berxwedanê Birêz Ocalan e. Divê tecrîd bê şikandin û azadiya fîzîkî ya Birêz Ocalan bê misogerkirin. Ji bilî vê tu rêyeke din tuneye. Daxwaza me aştiya birûmet e. Gelê me ji Wanê heta vir piştgirî dane me. Em ê teqez daxwazên gelê xwe pêk bînin.” Daxuyanî bi berzkirina dirûşmeyan û firandina kevokên aştiyê bi dawî bû.
Meş wê 15’ê Sibatê li gundê Amara yê ku Rêberê Gelê Kurd Abdullah Ocalan lê ji dayik bûye bi dawî bibe.
