Platforma Saziyên Demokratîk bi wesîleya 1’ê Sibatê Roja Piştevaniya bi Rojava re ya Cîhanê, li gelek bajarên Kurdistan û Tirkiyeyê meş û daxuyanî li dar xist. Daxuyaniyên ku bi dirûşma “Rojava berxwedan e, azadî ye” hatin lidarxistin de giringiya yekitiya neteweyî ya Kurdan û piştevaniya bi Rojava re hate destnîşankirin.
ANTALYA
Platforma Saziyên Demokratîk a Antalyayê, di çarçoveya 1’ê Sibatê Roja Piştevaniya bi Rojava re ya Cîhanê de li Rêxistina DEM Partiyê ya Antalyayê daxuyanî hate dayîn. Di daxuyaniyê de pankarta “Rojava wijdan e, azadî ye, berxwedan e” hate hilgirtin. Metna daxuyaniyê ji aliyê Hevserokê DEM Partiyê yê Antalyayê Selamî Ozyaşar ve hate xwendin. Ozyaşar got: “Çiraya azadiya ya li Rojava, bi stratejiya ‘Rêya Sêyemîn’ a rêzdar Abdullah Ocalan re bû yek û rêya jiyana demokratîk û azad nîşanê gelê herêmê dide. Bi vê baweriyê em 1’ê Sibatê Roja Piştevaniya bi Rojava re ya Cîhanê silav dikin.”
HATAY
Rêxistina DEM Partiyê ya Îskenderûnê, di çarçoveya 1’ê Sibatê Roja Piştevaniya bi Rojava re ya Cîhanê de li avahiya Rêxistina DEM Partiyê ya Îskenderûnê daxuyanî li dar xist. Metna daxuyaniyê ji aliyê Hevserokê DEM Partiyê yê Îskenderûnê Ozgur Vural ve hate xwendin. Vural bal kişand ser destkeftiyên Rojava û anî ziman ku piştevaniya bi Rojava re berpirsiyariye dîrokî ye û bangî hêzên demokrasiyê kir ku yekitiya demokratîk û neteweyî ava bikin.
