HESEKÊ
Şêniyên bajarê Hesekê di çarçoveya çalakiyên 1’ê Sibatê Roja Piştevaniya Rojava ya Cîhanê de, mîtînga piştgiryê li dar xist û êriş û gefên li dijî Rojava şermezar kirin.
Şêniyên ku li Çerxerêya Kevokê ya taxa Til Hecer a Hesekê kom bûn, pankartên bi nivîsên “Perwerdehiya bi zimanê Kurdî mafekî rewa ye”, “Maf û azadiya jinan garantiya jiyan û azadiyê li Sûriyeyê ye”, û “Garantîkirina mafên gelê Kurd di destûrê de erkekî neteweyî ye” hatin vekirin.
Mîtînga piştgiriyê bi deqeyek rêzgirtin dest pê kir. Piştre endamê Desteya Hevserokatiya
Partiya Yekîtiya Demokratîk (PYD), Aldar Xelîl axivî û diyar kir ku ev roj roja azadî, berxwedan û bidestxistina serkeftinan e.
Xelîl destnîşan kir ku berxwedana gelê Kurd komplo û planên li dijî wan hatine çêkirin têk bir, û bal kişand ser yekitiya gelê Kurd ku ji bo azadî, rûmet û mafan daket kolanan.
Xelîl her wiha behsa nakokiyên ku hin alî hewl didin di navbera pêkhateyên cûda yên herêmê de biafirînin kir û got, “Projeya Neteweya Demokratîk çareseriya van komplo û nakokiyan e.”
Xelîl diyar kir ku şoreş bi dawî nebûye û wan qonaxek nû ya têkoşînê dest pê kiriye, qonaxek ku divê her kes berxwedana xwe xurt bike û got, “Peymana ku hat îmzekirin encama hewldan, berxwedan û yekitiya gelê Kurd e. Entegrasyon dê li ser bingeha biratiya gelan be.”
Aldar Xelîl anî ziman ku divê berxwedan berdewam bike heta ku maf werin misogerkirin û di destûrek neteweyî de werin bicîhkirin.
Mîtîng bi berzkirina dirûşmeyên piştgiriya berxwedana gelê Kurd bi dawî bû.
TIL TEMIR
Li bajarê Til Temirê yê kantona Cizîrê jî bi beşdariya bi dehan kesî, tevî rûspiyên eşîran, endamên saziyên civaka sivîl, partiyên siyasî û rêxistinên jinan mîtîngek li çerxerêya Qendîl a başûrê bajar hat lidarxistin.
Di mîtîngê de hevserokê rêxistina PYD’ê ya Til Temirê Nîdal Emîn axivî û bal kişand ser hevgirtina gel. Her wiha banga domandina piştgiriya şervanan kir.
Hevseroka Meclisa Bajarê Til Temirê Gulîxan Sofî jî axivî û li ser hewldanên têkbirina ewlehiya Rojava hişyarî da. Gulîxan Sofî got, heya gel li derdora Rêveberiya Xweser û nirxên jiyana hevbeş kom bibe, wê ew hewldan neghêjin serî.
Di mîtîngê de hevserokê Rêveberiya Dibistanan a Til Temirê Xidir El Ilêwî anî ziman ku mîtîng îfadeya îradeya gelên herêmê ye, di heman demê de peyama yekitiyê li hemberî hemû gefan e. El Ilêwî got, îradeya gel ji hemû hewldanên têkbirina ewlehiya herêmê bihêztir e.
Di dawiyê de şêniyan peyama domandina berxwedana parastina bajarê xwe dan.
