Bi pêşengiya Komeleya Yekîtî Çand Piştevanî û Alîkariyê ya bi Malbatên ku di Dergûşa Şaristaniyê de Xizmên Xwe Winda Kirine re (MEBYA-DER) ya Stenbolê ji bo şehîdên Tevgera Azadiyê ya Kurdistanê ku di cih û dîrokên cuda de şehîd bûne, li navçeyên Kuçukçekmece û Ataşehîrê yên Stenbolê bernameyên bîranînê hatin lidarxistin.
Malbatê şehîdan, Dayikên Aştiyê, aktivîstên TJA’yê, endam û rêveberên partiyên siyasî, nûnerên saziyên civakî û gelek welatî tevlî bernameyên bîranînê bûn.
Li Kuçukçekmeceyê bername li avahiya DEM Partiyê hate lidarxistin. Di eywana bîranînê de li ser maseyan wêneyên şehîdan, Rêber Apo û qerenfîl hatin danîn. Li eywanê pankarta “Şehîd Namirin” hate daliqandin.
Bernameya ji bo şehîdan bi deqeyeke rêzgirtinê dest pê kir. Piştî rêzgirtinê axaftin hatin kirin. Rêveberên partiyên siyasî û saziyên sivîl diyar kirin ku ew ê her dem xwedî li şehîdên xwe derkevin û tu carî şehîdên xwe ji bîr nekin.
Piştî axaftinan li sînevîzyona ku qala têkoşîna cangoriyan dikir, hate temaşekirin û bername bi xwendina mewludê bi dawî bû.
