Hêzên Ked û Demokrasiyê yên Kendavê li Qada Burhaniye Cumhuriyet a Balikesirê “Civîna gel a nan, axê û edaletê” li dar xist. Partiyên siyasî û rêxistinên civaka sivîl li ber Pirtûkxaneya Kevin kom bûn û heta û qadê meşiyan. Di meşê de pankartên “Ji gelan re azadî, ji baweriyan re wekhevî”, “Em xweza û jiyanê diparêzin” û “Ji bo nan, aştî û azadiyê dawî li sîstema qesrê bînin” û dovîzên “Aştî mafê bingehîn ê jiyanê ye”, “Em axa xwe nadin” û “Em ê rê nedin qanûna dagirkeriyê” hatin hilgirtin. Di meşê de timî dirûşmeyên “Dest nede hewaya min, ava min, axa min”, “Li dijî faşîzmê mil bi mil” û “Jin jiyan azadî” hatin berzkirin.
Parlamenterê Partiya Wekhevî û Demokrasiyê ya Gelan (DEM Partî) yê Îzmîrê Îbrahîm Akin û parlamenterê Partiya Kedê (EMEP) yê Stenbolê Îskender Bayhan jî di nav de bi hezaran kes beşdarî mitîngê bûn.
Parlamenter Îskender Bayhan di mitîngê de axivî û got, “Ji bo wan, welatekî pîroz tê wateya mêtingeriya ked û xwêdanê. Em careke din li vir bi we re wan lanet dikin. Ji bo wan, edalet tê wateya qetilkirina bi sedan jin, zarok û karkeran.”
Parlamenter Îbrahîm Akin jî ev tişt anî ziman: “Li vî welatî av û axa me tê qirêjkirin. Divê em xwe ji mêtingeriya kedêû êrîşa ekolojîk biparêzin. Wekî DEM Partiyê, em ê komara demokratîk, azadîxwaziya jinê û ekolojîk ava bikin. Em ê aştiyê bînin. Li cihê ku jin tune be, berxwedan têk diçe. Ez ji vir jinan pîroz dikim.”
Endama Hevgirtina Jinên Serbixwe yên Kendavê Îffet Tayli jî got, “Em ê li dijî ‘pakêtên darazê’ yên ku hewl didin mafên me sînordar dikin, li ber xwe bidin. Em dizanin ku rizgariya jinan baviksalariyê ji holê radike û cîhanê diguherîne. li pêşiya me 25’ê Mijdarê Roja Têkoşîna Dijî Tundiya Ser Jinan a Navneteweyî heye. Em ê dîsa li vê qadê bin. Divê em ne tenê li dijî tundiya li ser jinan derkevin, di heman demê de ji bo jiholêrakirina wê û di her qada jiyanê de wekheviya zayendî di be rçavan de derbas bikin. Ji ber ku wekhevî nebe edalet jî nabe.”
