Platforma Jinan a Çewlîgê di çarçoveya 25’ê Mijdarê Roja Têkoşîna li Dijî Tundiya li ser Jinan a Navneteweyî cara yekem li bajêr meşa şevê li dar xist. Jinan li taxa Uydukentê kom bûn û pankarta “Bi civaka demokratîk ber bi jiyanek azad û bê tundî ve” vekirin. Jinan laçikên spî li xwe kirin û heta pêşiya Kalium AVM’ê meşiyan. Di meşê de dirûşmeyên “Jin jiyan azadî”, “Destên dirêjî jinan dibin wê bên şikandin” û “Qetilkirina jinan polîtîk in“ berz kirin.
‘EM Ê BIBIN DENGÊ HEMÛ JINAN’
Sekretera Egîtîm Senê ya Şaxa Çewligê Gamze Nûr Aslan piştî meşê daxuyanî da. Gamze Nûr Aslan diyar kir ku ew ê bibin dengê hemû jinan û got, “Bi mîrateya ku ji Mîrabelan heta niha tê re em ê bi hev re jiyanek bê tundî, azadî û civaka demokratîk ava bikin. Em 25’ê Mijdarê hem bi hêrsa jinên ku hatine qetilkirin û hem jî bi hêviya avakirina aştiya herêmê pêşwazî dikin.”
‘EM HER TIM DIBÊJIN ROJÎN XWE NEKUŞTIYE’
Endama Komîsyona Edaletê ya Rojîn Kabaîş Şevval Tuker diyar kir ku jin di bin navê xwekuştinê de tên qetilkirin û wiha domand: “Em şahidên bi sedan jinên li vê axê ne ku di bin navê xwekuştinê de ji me hatine girtin. Em her tim dibêjin Rojîn xwe nekuştiye. Mîna Şule, mîna Gulistan… Îro, me ev yek bi têkoşîna xwe îspat kiriye. Têkoşîna ku me li qadan, li kampusan û li kolanan da meşandin vê yekê pêk aniye. Lê neqediyaye; divê têkoşîna me ji duh mezintir be.”
Daxuyanî bi dirûşmeya “Jin jiyana azad” bi dawî bû.
