Navenda Ragihandina ya QSD’ê der barê mijarê de nûçeyek parve kir.
Li gorî nûçeyê, beriya 45 rojan li Akademiya Şehîd Mihemed El Xelîl bi tevlêbûna 51 şervanên Meclisa Leşkerî ya Kisrayê ya kantona Dêrazorê dewreyek perwerdeyê hatibû destpêkirin. Hat diyarkirin ku di dewreya perwerdeyê de bi navê Şehîd Besam El Sultan hatibû organîzekirin, waneyên siyasî, bîrdozî û perwerdeyên leşkerî li ser bikaranîna çekên sivik û navîn hatin dîtin.
Bi armanca qedandina dewreya perwerdeyê duh merasîmek hat lidarxistin. Di merasîmê de hejmarek fermandarên Meclisa Leşkerî ya Kisrayê û QSD’ê beşdar bûn.
Merasîm bi deqeya rêzgirtin û torana leşkerî ya şervanên Meclisa Leşkerî ya Kisrayê dest pê kir. Piştre ji fermandarên Meclisa Leşkerî ya Kisrayê Ewad Salim El Ebid axivî. Fermandar El Ebid di axaftina xwe de qedandina dewreyê li şervanan pîroz kir û da zanîn ku şervan bi moraleke bilind tev li perwerdeyê bibûn.
El Ebid di dewama axaftina xwe de girîngiya perwerdeyê ji bo pêşxistina asta mamosteyan û mezinkirina QSD’ê vegot û diyar kir ku herêm di pêvajoyeke hesas re derbas dibe, loma divê asta parastinê bê xurtkirin.
Di dawiya merasîmê de şervanên dewreya perwerdeyê qedandin sonda leşkerî xwarin û li yekîneyan hatin belavkirin.
