Saziyên jinan li Edeneyê li dijî desteserkirina îradeyê pêkhateya “Jinên ji bo Demokrasiyê” ava kir. “Jinên ji bo Demokrasiyê” ku avakirina xwe ragihandin li ber Avahiya Kevir a Şaredariya Bajarê Mezin a Edeneyê bi dirûşmeya “Jinên ji bo Demokrasiyê li dijî qeyûm tên bahev” daxuyanî da çapemeniyê. Jinan bi dirûşma “Jin jiyan azadî” tilîlî û çepikan bersiv da polîsên ku ew dorpêçkirin.
‘EM Ê DESTÛRÊ NEDIN DESTESERKIRINÊ’
Delal Ozbey a li ser navê pêkhateyê daxuyanî da, diyar kir ku ji bo mafên xwe û li dijî qeyûm hatine ba hev. Ozbey, îşaret kir ku di 6 mehên ewil ên salê de 205 cînayetên jinan çêbûn û 117 ji wan bi awayekî biguman mirî hatin dîtin û wiha got: “Faîlên jinên hatin qetilkirin yên xwe ji Peymana Stenbolê kişandin, dixwazin qanûna bi hejmara 6284’an rakin, polîtîkayên necezakirinê pêk tînin û di bin navê otenaziyê de dixwazin canên me yên li kolanan qetil bikinin. Em tevî desthilata ku van êrîşan bi rê ve dibe jî dest ji qanûna bi hejmara 6284’an û 5119’an bernadin. Ev qanûn tevî hemû kêmasiyan jî yên me ne. Em destûrê nadin ku mafên me yên bi van qanûnan hatine bidestxistin bên desteserkirin.”
Ozbey, di berdewama axaftina xwe de wiha got: “Em ji bo ku xwedî li şaredariyên me yên hatine bijartin derkevin li vir daxuyaniyê didin. Ji bo ku kesên qeyûm tayînî Şaredariya Colemêrgê ya bi hilbijartinê windakirin qeyûm tayînî Şaredariya Bajarê Mezin a Edeneyê nekin li vir in.” Ozbey, anî ziman ku qeyûm di heman demê li pergala hevserokatiyê darbeyeke û wiha domand: “Em polîtîkayên rêveberiya qeyûm a îradeya gelê Kurd nas nake, jinan mehkumî tundiya fizîkî û psîkolojîk dike û polîtîkayên wan ên dijminê jinan qebûl nakin. Divê desthilata îradeya gel desteser dike dest ji tayînkirina qeyûman a li cihên ku bi hilbijartinên nekarî bigire berde. Em ji vir careke din bang li desthilat û alîgirên wan dikin. Em destûr nadin ku hûn di bin navê qeyûm de îradeya me xesp bikin û destkeftiyên me yên jinan ji holê rakin. Em bang li hemû jinan dikin ku ji bo mafên me û jiyana me xwe bi rêxistin bikin û têbikoşin.”
