Cenazeyên şervanên Hêzên Komandos ên QSD’ê Ferhad Dirbêsiyê (Rojhat Omer) û Mazlûm Dirbêsiyê (Mehmûd Ehmo) yên 21’ê Çileya îsal di berxwedana li Bendava Tişrînê ya li hemberî êrîşên dewleta Tirk a dagirker û çeteyên wê de şehîd bûne, îro bi merasîmekê li Pakrewangeha Şehîd Rustem Cûdî ya li gundê Berkevirê hatin veşartin.
Bi sedan şêniyên bajar û gundên Dirbêsiyê, endamên saziyên sivîl û meclisan, hêzên Ewlekariya Hundirîn û nûnerên partiyên siyasî beşdarî merasîmê bûn.
Merasîm bi deqeyeke rêzgirtinê dest pê kir. Piştre hevserokê Meclisa Malbatên Şehîdan a Dirbêsiyê Mihemed El Xetîb axivî û got: “Berxwedana gelê Bakur û Rojhilatê Sûriyeyê û lehengiyên QSD’ê girêdan û hevgirtina di navbera pêkhateyên herêmê û girêdana wan a kûr bi xak û şehîdan ve îsbat kir.”
BENDAVA TIŞRÎNÊ SEMBOLA BERXEDANÊ Û SOZA SERKEFTINÊ YE
Girêdayî mijarê, yek ji fermandarên Meclisa Leşkerî ya Amûdê Omran Orkêş diyar kir ku berxwedana Bendava Tişrînê rêya manewî ya nifşên nû ye û wê bibe xala destpêkirina ber bi pêkanîna aştî û demokrasiyê li Sûriyeyê.
Orkêş wiha domand: “Em soz didin şehîdên xwe li ser şopa wan bin û armancên ku ew di oxira wan de têkoşiyane û şehîd bûne, pêk bînin.”
Xalê şehîd Rojhat, Asim Sîno soza şopandina rêya têkoşîna heta pêkanîna serketinê da. Her wiha apê şehîd Mehmûd Hemo, Gabar Hac Elî diyar kir ku berxwedana lehengane ya li Bendava Tişrînê gelê herêmê ji komkujiyên misoger bi destê dewleta Tirk a dagirker û çeteyên wê rizgar kir.
Di dawiyê de wesîqeyên her du şehîdan hatin xwendin û radestî malbatên wan hatin kirin. Cenazeyên her du şehîdan bi tilîliyên dayik û silavkirina berxwedana QSD’ê û YPJ’ê hatin veşartin.
