Di serî de Tetuan, Kazablanka û Rabat roja Şemiyê li gelek bajaran bi sedan kes daketin qadan.
Girseya gel a li Tetuanê li hev kom bû, dirûşmên “Gel dixwaze dawî li nelirêtiyê bê anîn” û “Azadî, rûmet, edaleta civakî” qîriya.
Li Kazablankayê xwepêşandêran gotin, “Em perwerde û tenduristiyê dixwazin” û meşiyan. Li paytext Rabatê jî komek ji xwepêşandêr li ber avahiya parlamentê li hev kom bûn.
Ev pêla şermezarkirinê bi pêşengiya tevgera GenZ 212 pêk tê ku 27’ê Îlonê destpê kir. Tevger xwe weke komeke ‘ciwanên azad’ bi nav dike ku têkiliya xwe bi partiyeke siyasî re nîne.
Çalakî bi nerazîbûna li hemberî mirina 8 jinên ducanî destpê kirin, ku jinên ducanî li Agadirê ji bo sezaryanê çûbûn nexweşxaneyeke dewletê, lê belê jiyana xwe ji dest dabûn.
Êvara înê Rabat û Agadir jî di nav de li gelek bajaran bi sedan kes daketin kolanan. Lê belê piştî çalakiyan li hin bajarokên biçûk bûyerên tundiyê rû dan.
Rayedaran diyar kirin ku li gundê Lqliaa yê nêzî Agadirê komekê êrîş bir ser qereqola jendermeyan, hewl dan çek û cebilxaneyê bi dest bixe, di vê kêliyê de 3 kes di dema ‘parastina rewa’ de hatin kuştin.
Kolektîfa GenZ 2012 li ser platforma Discordê xwedî 180 hezar şopîneran e. Komê diyar kir ku çalakiyên wan bi temamî aştiyane ye û got, “Em her cûre tundî, serhildan an jî hilweşînê red dikin.”
