Li gelek navendan vexwandina Serokê desthilata demkî ya Sûriyeyê Ehmed El-Şara ji bo Foruma Dîplomasiyê ya Antalyayê, li gelek bajaran hat protestokirin.
EDENE
Li Edeneyê pêkhateyên Elewî û jin, vexwandina Serokê desthilata demkî ya Sûriyeyê Ehmed El-Şara ji bo Foruma Dîplomasiyê ya Antalyayê, protesto kirin. Di çalakiyê de li ser navê Piştevaniya Mor Pelîn Çîçek mafê axaftinê girt û bal kişand ser sûcên HTŞ’ê û wiha got: “Li Sûriyeyê jin tên qetilkirin, em bêdeng namînin.”
Pelîn Çîçek bi berdewamî wiha got: “Her pergala ku bi tunehesibandina îradeya jinan tê avakirin, pergala zextê ye û mehkûmî hilweşandinê ye. Em ê di 24’ê Nîsanê de li Samandagê ji bo bibin dengê qirînên li derveyî sînor li hev bicivin. Em ê çalakiyên xwe yên ku me di 11’ê Nîsanê de da destpêkirin, bi Dîwara Aşitiyê ku em ê li sînorê Sûriyeyê bi jinan re ava bikin, bidomînin. Em jin, dest didin hev. Jinên li Sûriyeyê ne bi tenê ne. Em ê bibin dengê jinan. Em bang li hemû jinan dikin ku di 24’ê Nîsanê de li Samandagê piştevaniya jinên li derveyî sînor bikin.”
ANTALYA
Li Antalyayê saziyên Elewî li pêşiya Şaxa Altinova ya Komeleya Çandê ya Pîr Sultan Abdal (PSAKD) daxuyaniya çapemeniyê dan. Hêzên Ked û Demokrasiyê jî tevlî çalakiyê bûn û gelek caran dirûşmeyên “Bêdeng nemîne, ji Colanî re na” û “Kujer wê here, aşitî wê were” hatin berzkirin.
Di çalakiyê de rêveberê Şaxa Altinova ya PSAKD’ê Abdurrahman Karadag destnîşan kir ku li Sûriyeyê komkujiyên li dijî Elewiyan dewam dike û berpirsê vê jî Serokê HTŞ’ê ye. Karadag wiha got: “Hatina Colanî ne tenê li dijî Elewiyan, êrîşa li dijî her kesên ku li van xakan aşitî, xwişk-bratî, wekheviyê diparêzin e. Me di tevahiya dîrokê de serî li hemberî kujeran netewand û em ê netewînin.”
MÊRSÎN
Platforma Ked û Demokrasiyê ya Tarsûsê jî li Qada Yarenlîk daxuyaniya çapemeniyê da. Li ser navê Platformê Mahmût Sarica daxuyanî xwend. Sarica bal kişand ser hatina Ehmed El-Şara ji bo Tirkiyeyê û wiha got: “Ehmed El-Şara sûcdarê şerê ye. Mixabin hikûmeta AKP’ê ji serî ve piştgirî da van çeteyan, wan mezin kir, alîkariya lojîstîk û çek da wan. Ev hevkarî, hevkariya sûcê qirkirinê ya li Sûriyeyê ye.”
STENBOL
Saziyên Elewî yên Stenbolê jî li qada Rihtim a Kadikoyê li hev civiyan. Parlementera DEM partiyê Çîçek Otlu, endamên Partiya Sosyalîst a Bindestan (ESP) û Partîzan tevlî çalakiyê bûn. Di çalakiyê de dowîzên “Kujer, ji welatê me bicehime”, “Kujer HTŞ, hevkar AKP”, “Bila qirkirina Elewiyan a li Sûriyeyê bi dawî bibe” hatin hilgirtin. Di çalakiyê de daxuyaniya çapemeniyê ya hevpar ji aliyê Cîgirê Serokê Federasyona Elewiyên Bektaşî Îbrahîm Karakaya xwend.
