Di çarçoveya “Pêvajoya Aştî û Civaka Demokratîk” de li Êlih, Mêrsîn û Mûşê meş û şahî hatin lidarxistin.
ÊLIH
Meşa ku ji aliyê Platforma Saziyên Demokratîk ve hate organîzekirin, parlamenter DEM Partiyê, hevşaredarên ku ji peywirê hatine dûrxistin, nûnerên partiyên siyasî û rêxistinên civaka sivîl û gelek kes beşdarî şahiyê bûn. Beşdaran li ber def û zurneyê govend gerandin, stranên Kurdî gotin û dirûşmeyên “Bijî Serok Apo” û “Jin, jiyan, azadi” berz kirin.
Parlamenterê DEM Partiyê yê Êlihê Mehmet Ruştu Tiryakî got: “Gelê me li pişt banga aştiyê ya Îmraliyê ne. Hesreta 40 salan a ji bo aştî û civaka demokratîk îro teşe digire. Rexne û gumanên gelê me li ser vê pêvajoyê hene û wan rasterast anîne ziman. Hêviya me ji desthilatdariya siyasî ew e ku dema ku şerê 40 salan bi dawî dibe, ew ê piştgiriyê bidin vê pêvajoyê. Bi deh hezaran girtiyên siyasî di girtîgehê de ne, hevserokên partiya me, parlamenter û hevşaredarên me hene. Wekî din, rêberê gelê me Birêz Abdullah Ocalan jî di girtîgehê de ye. Ji bo ku ev pêvajo bi ser bikeve, em dixwazin ku danûstandinên siyasî di bin şert û mercên wekhev de werin kirin ku aştî û demokrasiyê ji gelê me re bîne. Em, wekî saziyên gelê Kurd amade ne ku piştgiriyê bidin vê pêvajoyê, di nava aştiyê de bijîn. Em ji hikûmet jî hêvî dikin ku ji vê yekê re amade be.”
MÊRSÎN
Bi hezaran kes beşdarî “Şahiya Aştî û Civaka Demokratîk” a ku li navçeya Toroslar a Mêrsînê hate lidarxistin, bûn. Nûnerên Dayikên Aştiyê, DEM Partî, DBP’ê di çalakiyê de axivîn. Emîne Eren ji bo dayik careke din negirîn, banga aştiyê kir.
Hevseroka DEM Partiyê ya Mersînê Bedriye Kuş daxwaza azadiya girtiyên siyasî kir. Hevserokê DEM Partiyê yê Mêrsînê Reşat Aşan jî banga xwe ya ji bo aştiyê dubare kir.
Di çalakiyê de ciwanan posterên mezin ên Rêber Apo û Fermandarê Pêngava 15’ê Tebaxê Mahsum Korkmaz vekirin û dirûşmeyên “Bijî Rêber Apo” berz kirin.
Parlamenterê DEM Partiyê Alî Bozan li ser girîngiya diyalog û muzakereya pirsgirêka Kurd rawesriya û diyar kir ku ew gefên li dijî Rojava red dikin. Bozan wiha domand, “Em di pêvajoya aştî û civaka demokratîk de alîgirê çareseriya çar parçeyan e. Em ne tenê ji bo Kurdan, ji bo 86 milyon welatiyan têdikoşin. Em ê bi hev re Tirkiyeyeke demokratîk ava bikin.”
Piştî axaftinan, hunermend Sîpan Xelat derket ser dikê û gel coşand.
MÛŞ
Di şahiya ku bi pêşengiya DEM Partî, DBP û TJA’yê ve hate lidarxistin de girse li nav bajêr meşiya û dirûşmeyên “Jin, jiyan, azadî” û “Bijî Serok Apo” berz kirin.
Huseyîn Olan di şahiyê de axivî û banga Rêber Apo ya 27ê Sibatê bi bîr xist û diyar kir ku şewitandina çekên PKK’ê gaveke girîng a ber bi aştiyê ve ye. Olan di şexsê Nûreddîn Sofî de kesên keda wan di vê yekê de derbasbûne silav kir û banga xwedîderketina pêvajoya aştiyê kir.
Şahî bi stran û gerandina govendê bi dawî bû.
