Li bajarê Hamburg ê Elmanyayê bi wesîleya 8’ê Adarê Roja Jinên Cîhanê, ji aliyê Meclîsa Jinan a Rojbîn, Tevgera Jinên Kurd a Demokratîk a Ewropayê (ADKH) û saziyên Mala-Mafê paneleke hevpar hate lidarxistin. Panel bi sernavê “Têkoşîna jinan, piştevanî û hêza rêxistinkirî” li salona Centro Sociale hate lidarxistin û gelek kes tevlî bûn.
Moderatoriya panelê ji aliyê Hevseroka NCKD’ê ya Hamburgê Fatma Dogan ve hate kirin. Dogan beşdaran silav kir û wiha got, “Em bi wesîleya 8’ê Adarê tên ba hev, tecrubeyên xwe parve kirin û bi hev re xurt dibin.
Çalakî bi deqîqeyekî rêzgirtinê ji bo jinên ku di têkoşînên cîhanê de jiyana xwe ji dest dane destpê kir.
Piştre li ser navê Meclîsa Jinan a Rojbîn, siyasetmedar Fatma Kurtulan axivî û dîrokçeya 8’ê Adarê Roja Jinên Cîhanê bi kurtasî vegot. Fatma Kurtulan bal kişand ser têkoşîna li dijî zayendiya civakî û modela demokratîk a malbatê. Her wiha îşaret bi rewş û hêzên xweparastinê yên jinan ên li Tirkiye, Elmanya, Efxanîstan, Filîsîtin, Şengal û Sûriyeyê kir.
Kurtulan got, “Di bin gefên planên DYA û Îsraîlê yên li Rojhilata Navîn de, tasfiyekirina YPJ’ê tê xwestin, lê YPJ’ê diyar kir ku ew ê tu caran tawizê nede. Dema ku em 8’ê Adarê pîroz dikin, em ê çawa hebûna xwe biparêzin, em ê çawa bijîn, em ê çawa cîhana ku em dixwazin tê de jiyan bikin biafirînin, nîqaş bikin. Em jinên Kurd, bi têkoşînê azad bibin û civaka demokratîk ava bikin.”
Nûnera ADKH’ê jî bal kişand ser pirsgirêkên jinên koçber û îşaret bi girîngiya têkoşîna rêxistinkirî kir. Li ser navê Mala-Mafê ya Hambirgê Bedrana Yildirim jî têkoşîna nasname û hebûnê ya jinên Kurd û Elewî vegot û di dawiyê de helbestê xwend.
Piştî pêşkêşiyan gelek jin mafê axaftinê girtin, nêrînên xwe parvekirin û pirsan kirin. Panel piştî nîqaşan, bi banga tevlîbûnê ya ji bo meşa ku wê di 8’ê Adarê de li Hamburg- Landungsbruckenê were lidarxistin, bi dawî bû.
