Li Swîsreyê, çend roj beriya 8’ê Adarê Roja Jinên Kedkar ên Cîhanê, amadekarî hatin temamkirin. Yekîtiya Jinên Kurd li Swîsreyê (YJK-S), bi daxuyaniyeke çapemeniyê ku li Navenda Civaka Demokratîk a Kurd a Zurichê lidar xist, starta çalakiyên 8’ê Adarê da.
Daxuyanî li ser navê YJK-S’ê ji aliyê Aliye Bora ve hat xwendin. Di belavokê de bal hat kişandin ser sala 169’emîn a berxwedana 40 hezar jinên karkerên tekstîlê yên New Yorkî ku li ser bihayê canê xwe dabûn destpêkirin û hat gotin: “Em bi xurtkirina hewldana têkoşîna xwe ya li dijî polîtîkayên şer, mêtingerî, xizanî û qirkirina jinan a li her derê cîhanê, dikevin 8’ê Adarê. Di şexsê Deniz Çiya, Hevrîn Xelef, Arîn Mîrkan, Jîna Emînî, Sakine Cansız, Rosa Luxemburg û Clara Zetkin de em hemû jinên ku ji bo demokrasî, wekhevî û azadiyê jiyana xwe ji dest dane bi rêzdarî bi bîr tînin; em silavên xwe ji hemû jinên ku di girtîgehan de dîl hatine girtin re dişînin.”
Di daxuyaniyê de hat diyarkirin ku qirkirina jinê û tundî hîn jî berdewam dike û hat destnîşankirin ku jinên Kurd ên li Swîsreyê dijîn, hem beşek ji têkoşîna wekheviyê ne, hem jî bi berxwedana jinan a li Rojava, çar parçeyên Kurdistanê û cîhanê re di nava piştgiriyê de ne. Hat gotin ku jin li malê, li ser kar, li kolanan, li kampusê, li kargeh û li zeviyan bi şêweyên cuda yên mêtingerî û tundiyê re rû bi rû ne. Li gorî daneyên Neteweyên Yekbûyî, li cîhanê her 10 deqîqeyan jinek an jî keçikek ji aliyê zilamekî nêzî xwe ve tê kuştin. Di daxuyaniyê de hat diyarkirin ku tundiya li ser jinê ne tiştekî yekane ye, lê berhema pergala serdest a mêr e.
Di belavoka çapemeniyê de bal hat kişandin ser êrişên li ser Rojava jî û hat gotin: “Şoreşa jinê ya ku li Rojava bilind dibe, nîşan da ku azadiya jinê ne tenê daxwazek e, rastiyeke ku dikare bê avakirin e. Lê belê planên komployên navneteweyî û herêmî hîn jî berdewam dikin. Destkeftiyên li Rojava ne di bin garantiyê de ne û dema ku dorpêça li Kobanê berdewam dike, planên êrişê yên li ser Şengalê têne kirin. Şoreşa jinê ya ku li Rojava bilind dibe a me ye û em ê parastina wê bidomînin.”
Di belavokê de her wiha bal hat kişandin ser salvegera yekemîn a Banga Civaka Demokratîk û Aştiyê ya Rêber Apo û hat diyarkirin ku divê têkoşîna azadî, wekhevî û aştiyê li Rojhilata Navîn bê domandin. Hat destnîşankirin ku 8’ê Adarê ne tenê pîrozbahiyek e, roja mezinkirina rêxistinbûnê û xurtkirina jiyana komunal e.
Di dawiya daxuyaniyê de bang li hemû jinan hat kirin ku beşdarî çalakî û eylemên ku bên lidarxistin bibin. Peyama “Li dijî dijminatiya jinê û neheviyê îsyana me mezin dibe! Bijî 8’ê Adarê û yekîtiya têkoşîna jinên cîhanê! Em ê bi hev re li ber xwe bidin, em ê bi hev re qezenc bikin! Rojava, Rojhilat û Kurdistan yek welat e! ROJAVA WARÊ JINÊN AZAD E; EM Ê BIPAREZIN! Jin Jiyan Azadî!” hat parvekirin.
BERNAMA ÇALAKIYÊN 8’Ê ADARÊ YÊN LI SWÎSREYÊ
- Aarau: Panel “Ji Duh heta Îro Tecrubeyên Me yên Têkoşîna Jinê”, 5’ê Adarê, Komela Lenzburg, 18:30, Aktîvîsta TJK-E.
- Solothurn: Hevdîtina Jinan, 1’ê Adarê, Komela Solothurn, 13:00.
- Langenthal: Hevdîtina Jinan, 3’ê Adarê, Restorana Sonne, 14:00.
- Luzern: Belgefilmê Jinwar, 6’ê Adarê, Komel, Würzenbachstrasse 54, 18:00.
- Ticino: Meşa Navendî, 8’ê Adarê, Stazione di Bellinzona, 14:30.
- Bern: Çalakiya Hevpar a bi Saziyên Dost re, 7’ê Adarê, Komel, Seidenweg 63, 18:00 / Meşa Navenda Herêmê, 8’ê Adarê, Bahnhofplatz, 15:00.
- Biel: Nîşandana Fîlm, 6’ê Adarê, Komel, General Dufourstrasse 60, 18:30.
- Freiburg: Nîşandana Fîlm, 7’ê Adarê, Komel, Avenue de Midi 5, 14:00.
- St. Gallen: Fîlmê Diren, 6’ê Adarê, Komel, Poststrasse 10, 18:00 / Meş, 8’ê Adarê, Kornhausplatz, 16:00.
- Chur: Belgefilmê Jinwar û Hevpeyvîn, 8’ê Adarê, Aspermontstrasse 17, 18:00.
- Lozan: Nîşandana Fîlm û Hevpeyvîn bi Derhêner re, 3’ê Adarê, Póle Sud, Avenue Jean-Jacques Mercier 3, 18:30 / Meşa bi Dostan re, 7’ê Adarê, Place de la Cathédrale, 15:00.
- Genève: Nîşandana Fîlmê Jiyan, 6’ê Adarê, Navenda Civaka Demokratîk a Kurd, 18:00 / Daxuyaniya Çapemeniyê ya Collectif Grève Féministe, 8’ê Adarê, Centro Sociète, 16:00.
- Valais/Wallis: Sînevîzyon, 4’ê Adarê, Ruelle de la Lombardie 29, Sion / Meş, 7’ê Adarê, Place de la Planta, 14:30.
- Zürich: Hevdîtina Jinan û Nîşandana Fîlm, 1’ê Adarê, Komel, Steinwiesenstrasse 1, 13:00 / Meşa Navenda Herêmê, 7’ê Adarê, Paradeplatz, 13:00 / Çalakiya Kon “Li Rojava Şer Dikin, Li Cîhanê Azad Dibin”, 14’ê Adarê, Werdmühleplatz, 13:00.
- Basel: Taştêya bi Dostan re û Bernameya Çandî, DemKurd Elsässerstr. 215, 10:00 / 13:00 Ji Komelê bi Komî Çûyîna Çalakiyê / Meşa Navenda Herêmê, 8’ê Adarê, Marktplatz, 14:00 / Panel, 14’ê Adarê, Verso, UniBas, 18:30.
- Neuchatel: Meşa Hevpar a bi Dostan re, 7’ê Adarê, Rue de l’Hopital 2, 11:00.
