Wezîra Karên Hundir Judith Uitermark têkildarî biryara hilbijatina pêşwext li ser hesabê xwe yê medyaya dîjîtal daxuyanî da. Uitermark diyar kir ku hilbijartin “ji bo demokrasiyê girîng e” û anî ziman ku ji bo pêvajoya hilbijartinê bi rêkûpêk bimeşe ew ê bi şaredariyan û aliyên peywendîdar ên din re bixebitin.
POLÎTÎKAYA PENABERIYÊ KOALISYONÊ HEJAND
Ji ber ku partiya PVV’ê ya serokê rastgir Geert Wilders ji nişka ve ji koalîsyonê vekişiya û hikûmet hilweşiya. Piştî hilweşîna hikûmetê biryara hilbijartinên pêşwext hat dayin.
PVV di hilbijartinên Mijdara 2023’yan de ji 150 kursiyên parlamentoyê 37 jê bi dest xistibû û hewl dabû ku hikûmetê ava bike. Lê hevkarên koalîsyonê li dijî serokweziriya Wilders derketin û li ser namzetê serbixwe Dick Schoof li hev kirin. Serokên koalîsyonê li şûna ku bibin wezîr serokatiya partiyên xwe domandin.
Pêvajoya hilbijartina Holandayê ya ku pêncemîn aboriya herî mezin a Ewropayê ye, ji aliyê tevahiya parzemînê ve bi baldarî tê şopandin. Anketên dawî nîşan didin ku PVV ya Wilders û tifaqa Kesk-Sosyal Demokratan a ku Cîgirê Serokê Berê yê Komîsyona YE Frans Timmermans serokatiya wê dike nêzîkî hev in û partiya lîberal VVD li pişt wan e.
Ji ber pergala siyasî parçe ye, nayê hêvîkirin ku ti partî bi tena serê xwe piraniya dengan bi dest bixe. Ev jî pirsa ku kîjan partî wê koalîsyona nû ava bikin derdixe holê.
