Li Îranê Hossein Ghavi/Silawi (28), ji ber îşkenceya ku di navenda binçavkirinê de dît, jiyana xwe ji dest da. Ghavi yê ku li herêma Zargan a li bakurê Ahvazê dijî, beriya demekê bi angaştên “fîlmkirina herêmên hatine bombekirin” û “têkiliya bi saziyên biyanî re” hatibû binçavkirin û girtin.
Li gorî agahiyên hatine bidestxistin; Ghavi yê ku di navenda binçavkirinê ya îstîxbarata Îranê de dihat girtin, di encama îşkenceyên giran de şehîd bû. Rayedarên îstîxbaratê di 2’yê Nîsanê de bi telefonê agahî dan malbata wî û ragihandin ku Ghavi miriye. Der barê sedema mirina Ghavi de tu agahî bi malbatê re nehat parvekirin. Her wisa termê Ghavi jî hîna radestî malbata wî nehatiye kirin.
