Koordînasyona PAJK’ê di daxuyaniya xwe ya bi wesîleya 4’ê Nîsanê rojbûna Rêber Apo de ev tişt diyar kirin:
“Jidayîkbûna Rêber Apo jidayîkbûna mirovê azad e. Ji 4’ê Nîsana 1949’an û vir ve her kêliya wî bi rojbûnên nû ve derbasbûye ku 77 sal temenê xwe diyarî civakê û azadiyê kiriye. Ji ber wê 4’ê Nîsanê di serî de gelê Kurd, jin û zayîna azadiya mirovahî û giştî jinan e. Sedema ku li çar aliyê cîhanê bi milyonan mirov vê rojê bi pîrozbahiyên mezin pêşwazî dikin ew e ku ev yek veguheriye destaneke berxwedanê ya ku pençên înkar-îmha û qirkirina çandî parçe dike. Bi vê rojbûna destanî re hebûna Kurd di nava malbata mirovahiyê de cihekî bi rumet girtiye. Ji dîrokek tarî, pêçayî û mirî nivîsandina dîrokeke ku ronî dibe û ronî dike, zindî dibe û zindî dike; di nav temenek û têkoşîna azadiyê ya nîv sedsalê de hatiye bicihkirin.
Rêber Apo mîmarê ronesansa Kurd û jinê ye ku aqilê Kurd û jinê yê ronîbûyî derxistiye holê û ji Kurdistanê ber bi Rojhilata Navîn û cîhanê ve vebûye. Rêber Apo jidayikbûna xwe ya duyemîn bi PKK’ê re û ji dayîkbûna xwe ya sêyemîn jî wekî paradîgmaya modernîteya demokratîk pênase dike ku xwedî têkoşîneke mezin a mirovahiyê ya li dijî mêrtingerî û kapîtalîzma gerdûnî ye. Ji bo paqijkirina hemû cîhanê ji qirêjiyên ku dewlet û desthilatdarî bûne sedema wê, paradîgmaya demokratîk, ekolojîk û azadîxwaziya jinê ava kir. Çalakvanekî azadiyê ye ku rojbûna xwe ya yekem bi rojbûnên nû ve domandiye û veguherandiye rojbûna mirovê azad. Ew naveda nirxên herêmî û gerdûnî ye; nûnerê nasname, kesayet û rêbertiyeke gerdûnî ye ku her mirovekî lêgerînerê azadiyê, her jin, bawerî, çand û netewe dikare xwe tê de bibîne. Li dijî dîroka derewîn, fêlbaz, komplo û qirkirin-kuştinê ya pergala mêr-dewlet; hêza jiyanê ya li ser bingeha zelalî, durustî, camêrî, exlaq û felsefeya azadiyê derxistiye holê.
Di serdemeke ku kujerên kastîk dixwestin hemû cîhanê di qirkirinê re derbas bikin de, Rêber Apo di 27’ê Sibata 2025’an de bi ‘Banga Aştî û Civaka Demokratîk’ pêşengiya jidayikbûneke nû kir. Ev jidayikbûn; bidestxistina nasname û kesayetiya azad a Kurd û jinê ye ku xwe ji nû ve diafirîne û hebûna xwe îsbat dike; veguherîna wan a ber bi bîreweriya avaker a komara demokratîk ve ye. Azadiya fîzîkî ya Rêber Apo şerta bingehîn a geşedana tendurist a vê avabûnê ye. Bi wesîleya 4’ê Nîsanê dixwazin careke din diyar bikin ku azadiya fîzîkî ya Rêber Apo hinceta têkoşîna bingehîn a hemû jin û Kurdan e. Sedema bingehîn a piştgiriya civakî ya ji bo vê pêvajoyê ye. Dirûşme û daxwaza bingehîn a hemû çalakiyên ku ji serê salê ve pêş dikevin û her wiha ya 15’ê Sibatê, 8’ê Adarê û 21’ê Adarê ‘Azadî ji Rêbertiyê re’ ye.
Rêber Apo, di Manîfestoya Civaka Demokratîk û Aştiyê de diyar dike ku divê bi rêya mîtolojiyê îtibara jinê lê were vegerandin. Di nameyên xwe de têkoşîna me ya azadiyê ya nîv sedsalê wekî ‘serdema qehremaniya jinê’ pênase dike. Ev pênasekirin, îtibara ku mîtolojiya azadiyê ya nîv sedsalê û afirînerê wê Rêbertiya me daye me ye. Ew deryaya zanyarî û pêkhateyê ye ku hemû korbûna îdeolojiyên mêrserwer bi vê têkoşîna mîtolojîk-destanî ronî dike û hêza têgeh, rêxistin û çalakiya ronesansa jinê û bidestxistina nasname û kesayetiya azad derdixe holê. Ev pêkhate ji bo me çavkaniyeke mezin a rûmet û şanaziyê ye. Bi Rêbertiyê re veguherandina vê destkeftiyê ji bo zayîna azad, hem wezîfe û hem jî garantiya jinên Kurd ên azad û hemû jinan e. Ji bo vê yekê em dibêjin; azadiya Rêber Apo azadiya me ye, hebûna wî hebûna me ye. Em vê diyalektîka wate û pêkhateyê bi kûrî hîs dikin, dijîn û pêkanîna pêdîviyên wê wekî hinceta hebûna xwe dibînin.
Bi gihîştina asta zanyariya felsefî, zanistî û exlaqî-polîtîk a manîfestoya me ya nû, em ê bi veguherîna bîreweriya kolektîf a derbasbûna ji îdeolojiya rizgariya jinê ber bi polîtîkayên rizgariya jinê ve, hêza xwe ya pratîk-polîtîk pêş bixin û xwedî li berpirsiyariyên xwe derkevin. Em bang li hemû jinan dikin ku vê rojbûna nû bi herî xurtî fêm bikin û bibin pêkhênerên wê.
Em bi biryar in têkoşîna ku ji Sakîneyan heta Bêrîtanan, ji Zîlanan heta Semayan û Denîzan dirêj dibe û riya xelasiya ji bûyîna zayend, netewe, çîn û nifşê ku rastî xezeb û qirkeriya xwedayan hatî ronî dike, bigihînin azadiyê.
Em ê bibin rêhevalên wan kesên ku ji çanda xwedawendan heta çanda jina azad pirên ji agir avakirine û bi Rêbertiya me ya ku gihiştiye sira zarokê rûmetdar ê xwendawendan re rû bi rû hatine. Em ê layîqî têkoşîna Rêber Apo ya azadkirina jinê û bi rûmet a di dîrokê de bin.
Jinên ku bi Rêber Apo re azadî û jiyanê nas kirine, wê ji bo azadiya fîzîkî ya Rêber Apo têkoşîna xwe bidomînin.
4’ê Nîsanê li gelê me, li jinan û li gelên cîhanê pîroz be!
