Li bajarê Sirînê ya Kantona Firatê di çarçoveya çalakiyên 25’ê Mijdarê Roja Têkoşîna Navneteweyî ya li Dijî Tundiya li ser Jinê, bi sedan mêr tevlî bernameyek a perwerdehiyê ya 3 rojan bûn. Di perwerde, semîner û civînan de behsa esasên tundiyê û bandorên wê hatin kirin û ji bo çareseriyê nîqaş hatin meşandin.
‘TUNDIYA LI SER JINÊ NAYÊ QEBÛLKIRIN’
Endama Komîteya Edaletê ya bajarê Sirînê Hecî Mihemed, bal kişand ser rol û mîsyona jinan a di nava civakê de û got tundiya li ser jinê nayê qebûlkirin. Mihemed got, “Civak bê jinan nikare bijî. Jin pêşeng, dayik û çavkaniyên jiyanê ne. Wek civak, em tundûtûjiya li dijî jinan red dikin.”
‘JIN Û MÊR BI JIYANA HEVPAR DIKARIN PÊŞ BIKEVIN’
Mihemed, anî ziman ku têgihiştina ku jinan tenê bi karên malê re sînordar dikir, bi şoreşê re ji holê rabûye û got, “Raman û felsefeya Rêber Apo di vê veguherînê de rolek girîng lîst. Di navbera jin û mêr de tu guhertin nîne, civak bêyî avakirina jiyanek hevpar û wekhev nikare pêş bikeve.”
‘DÎROKA TUNDIYÊ BI DEWLETÊ RE DEST PÊ KIR’
Endamê Meclîsa Rêveber a Hiqûqnasên Kantona Firatê Şahîn El Elî, li ser aliyê dîrokî yê tundiya li dijî jinan axivî û têkoşîna Xwişkên Mirabal ku di serdema dîktator Rafael Trujillo de li Komara Domînîkî hatin kuştin, bi bîr xist.
El Elî, diyar kir ku di roja îro de jî tundî dewam dike û got, “Divê tundî bi dawî bibe. Qanûn hene, lê guhertina rastîn bi veguherîna zihniyetê pêkan e.”
El Elî, diyar kir ku fikra “jiyana hevpar û azad” a Rêber Apo cihê jinan di civakê de xurt kiriye û got, “Jin niha li her qadê ne, di rêveberî de û di her aliyê jiyanê de çalak in. Ev fikr bûye qanûnek civakî.”
Li aliyê din di çarçoveya çalakiyên 25’ê Mijdarê de li Kantona Firatê îro bi tevlîbûna bi sedan mêr meşeke girseyî hate lidar xistin. Meş li Qada Jina Azad dest pê kir û li Qada Aştî bi dawî bû.
