Li bajarê Kobanê, pêdiviyên bingehîn ên jiyanê ji ber dorpêça 23 rojan û qutbûna elektrîkê bi awayekî cidî bandor bûne. Pêdiviyên bingehîn di serî de av, elektrîk û xwarin nîne. Hin bazirgan bi rêyên qaçaxî hewl didin pêdiviyên jiyanê bigihînin bajêr, lê ew jî gelek biha tên firotin.
QUTBÛNA AV, ÎNTERNET Û ELEKTRÎKÊ
Ji ber qutbûna elektrîkê û pirsgirêkên binesaziyê, nexweşxane, nanpêjxane û stasyonên avê nikarin bixebitin. Çar nexweşxaneyên girêdayî Desteya Tenduristiyê ya Kantona Firatê û du nexweşxaneyên taybet bi dabînkirina sotemenî û enerjiyê ya sînorkirî rojane hewl dide xizmetê bike.
DABÎNKIRINA XWARIN Û SEBZEYÊN QAÇAX
Peydakirina fêkî û sebzeyan jî zehmet bûye. Sebzeyên wekî firingî, belîcan, îsot, xiyar û kelem ji aliyê hin bazirganan ve bi rêya qaçaxî tînin bajêr. Ev berhem bi mîqdarên sînorkirî û bi bihayên bilind digihîjin gel. Her wiha şekir, çay, birinc, savar, nok û nîsk bi heman awayî bi rêyên qaçaxî têne bidestxistin.
ZEHMETIYÊN JIYANÊ
Kobanê ji ber dorpêça ku 23 roj in dom dikin di krîzeke cidî de ye. Gel ji bo gihîştina pêdiviyên bingehîn zehmetiyan dikişîne; bi taybetî nexweşxane û nanpêjxane bi kapasîteya sînorkirî dixebitin. Ev rewş bandorek cidî li ser şert û mercên jiyanê yên li bajêr dike.
TEMÎRKIRINA BINESAZIYA ELEKTRÎKÊ
Desteya Enerjiyê ya Kantona Firatê û rêveberiyên herêmî yên têkildar ji bo temîrkirina binesaziya elektrîkê ketin nava hewldanan. Xetên elektrîkê ku ji ber êrîşên çeteyên HTŞ’ê zirar dîtibûn, hate temîrkirin. Hêjayî bi bîrxistinê ye ku cihê çeteyên HTŞ’ê lê bûn elektrîk hebû, lê li ser bajarê Kobanê û gundewarên girêdayî wê bi temamî hatibû qutkirin. Piştî hewldanên mezin pêr bi şev elektrîka bajar û gundewarê Kobanê çêbû.
