Bi banga Platforma Saziyan a Demokratîk, girseya gel li ber avahiya navçeya Mîdyadê ya Mêrdînê ya DEM Partiyê li hev civiya, bi dirûşman ber bi navenda bajêr ve meşiya û peyama piştgiriyê da.
Di meşê de tim û tim dirûşmên “Bijî berxwedana Rojava”, “Bijî Serok Apo”, “Bijî berxedana Kobanê”, Bijî biratiya gelan”, “Yek e yek e yek e, gelê Kurd yek e” û “Rojava, Rojhilat e, Kurdistan yek welat e” hatin qîrîn. Her wiha alên Yekîtiya Jinên Suryan, Konseya Neteeyî ya Bethnahrîn û ala neteweyî ya Suryan hatin hildan.
Hevseroka DEM Partiyê ya navçeyê Nîlufer Elîk Yilmaz li çalakiyê axivî û anî ziman ku wê piştgiriya xwe ya ji bo Rojava dewam bikin. Nîlufer Elîk Yilmaz got, “Bi saya Rêberê Gelê Kurd Birêz Abdullah Ocalan ev komplo hate têkbirin. Em ê heta dawiyê piştgiriyê bidin Rojava û li qadan bin.”
Parlamenterê DEM Partiyê Kamûran Tanhan jî işaret bi bûyerên li Kobanê kir û ev bang li hikumetê kir: “Ji bo alîkariyên mirovî divê deriyên sînor tavilê bêne vekirin. Bi gotinên xwişk û biratiyê ev yek nabe. Gelê Kurd dixwaze vê yekê di pratîkê de bibîne. Eger em xwişk û birayê hev in, eger em wekhev in, eger demokrasî heye li vî welatî di serî de Deriyê Sînor ê Murşîtpinarê, divê deriyên sînor ên Nisêbîn, Serêkaniyê û deriyên sînor ên din bêne vekirin.”
Parlamenter George Aslan jî bi Suryanî axivî banga aştî û civaka demokratîk kir. George Aslan got, “Eger hikumeta Şamê bi rastî jî dixwaze li ser bingeha demokratîk Sûriyeyê bi rê ve bibe ne Kurdan ne jî Suryaniyan dikare ji nedîtî ve bê. Ji ber vê jî divê hikumeta Sûriyeyê bi berpirsyariya xwe rabe û gavên aştiyane biavêje. Naxwe wê Kurd jî Suryanî jî berxwedan xwe dewam bikin. Wê bi hev re têkoşînê bimeşînin.”
Piştî daxuyaniyê girseya gel careke din bi meşê vegeriya ber avahiya DEM Partiyê ya navçeyê.
