Meclîsa Jinan a Partiya Demokrasî û Wekheviyê ya Gelan (DEM Partî) li Mûglayê dest bi çalakiyên 8’ê Adarê kir. Bi vê armancê li navçeya Bodrûmê daxuyaniyek ji çapemeniyê re hate dayin.
Çalakî bi beşdariya Berdevka Meclîsa Jinan a DEM Partiyê Halîde Turkoglû pêk hat.
Halîde Turkoglû got, “Weke Meclîsa Jinan a DEM Partiyê li dijî her cûre polîtîkayên şer em ê di 8’ê Adarê de raperîna xwe mezin bikin.”
Halîde Turkoglû got, “Li qadên 8’ê Adarê em ê dengê xwe ji bo aştiyê hîn bilind bikin, raperîna xwe mezin bikin” û bi dewamî got, “Mixabin li vî welatî li dijî jinan polîtîkaya tundiyê bi rêk û pêk tê meşandin. Sedemeke hebûna me ya îro ya li Mûglayê ew e ku li gel kuştina Pinar Gultekîn a bi rengekî hovane, polîtîkaya bêcezahiştinê ya dadgeriyê di meriyetê de ye.”
Halîde Turkoglû bal kişand ser desteserkirina şaredariyan û ragihand ku qeyûm êrîşek li ser destketiyên jinan e û got, “Ne tenê îradeya gelê Kurd tê desteserkirin, her wiha darbeyek li dijî paşeroja hevpar a demokrasiyê ye.”
Halîde Turkoglû destnîşan kir ku jin ji bo azad bibin wê têkoşînê dewam bikin û got, “Bi nasnameya xwe ji bo azadiyê em jin em ê têkoşînê dewam bikin.”
Berdevka Meclîsa Jinan a DEM Partiyê işaret bi polîtîkayên şer jî kir û got, “Em ê têkoşîna xwe ya ji bo azadî û çareseriyê di vê 8’ê Adarê de li qadan hîn bêhtir biqîrin. Ji bo çareseriya demokratîk a pirsgirêka Kurd em ê bi dijberên şer re li hev kom bibin. Ji bo çareseriya demokratîk a pirsgirêka Kurd em jin em ê siyaseta aştiyê mezin bikin. Li dijî siyaseta şer wê siyaseta aştiyê bi ser bikeve û jin wê vê yekê bikin. Em jin em ê bi ser bikevin.”
