Erdheja giran roja Înê li nêzî bajarê Sagaingê rû da. Piştî çend deqeyan jî erdhejek bi mezinahiya 6.7 pileyî rû da. Erdhejê bajarê Bangkok ê Taylandê jî hejand ku bi hezar kîlometreyî navenda erdhejê bû.
Li Myanmarê bû sedema hilweşîneke giran a dehan salên dawî.
Mal, avahî, pir, cihên olî hilweşiyan. Li vî welatê ku ji sala 2021’ê û vir ve ji ber darbeya cûntayê di nava şerê navxweyî de ye, fikar hene ku erdhej rewşê hîn girantir bike.
Rêveberiya cûntayê ya li ser desthilatdariyê diyar kir ku herî kêm 1.644 kes mirin, 3.408 kes jî birîndar bûn. Hate ragihandin ku piraniya qurbaniyan li bajarê Mandalayê jiyana xwe ji dest dan.
Lê belê ji ber ku zerar li tora ragihandinê bûye, asta felaketê dibe ku hîn giran be.
Li gorî rayedarekî Xaça Sor, li Mandalayê zêdeyî 90 kes di binê xirbeyê avahiya ji deh qatî de man.
Rayedarên Myanmarê li şeş herêmên ku erdhejê bandoreke giran lê kir, rewşa awarte ragihandin.
Lîderê cûntayê Min Aung HIaing banga alîkariyê li saziyên navneteweyî kir.
Di vê navberê de Hêzên Parastina Gel ku rêxistineke serhildêr e, piştî erdheja giran ji bo karê alîkariyê hêsan bike, ji roja Yekşemê û pê ve ji bo du hefteyan agirbest ragihand.
TAYLAND
Li paytexta Tayland Bangkokê, xebatên rizgarkirinê yên ji bo mirovên di binê xirbeya avahiya ji 30 qatî de man, dewam dikin. Bi dehan karker di binê xirbeyên avahiyê de man.
Waliyê Bangkokê diyar kir ku herî kêm 8 kes li cihê bûyerê mirin û 8 kes jî bi sazî hatin rizgarkirin. Lê belê hîn jî 79 kes winda ne û fikar hene ku hejmara miriyan zêdetir bibe.
