Dayikên Şemiyê/Mirovên Şemiyê, ku her hefte ji bo aqûbeta xizmên xwe yên hatin windakirin an jî di binçavan de hatin qetilkirin bipirsin li Qada Galatasarayê tên cem hev û daxwaza darizandina faîlan dikin, di hefteya 1042’yemîn de jî li qada lêgerîna edaletê bûn. Di çalakiya ku parêzvanên mafên mirovan û xizmên windayan piştgirî danê de beşdaran qurnefîl û wêneyên windayan hildan. Di çalakiya vê heftê de li aqûbeta Yusuf Erîşti ê ku di 14’ê Adara 1991’an de li Stenbolê hatî windakirin hat pirsîn.
Metna daxuyaniyê ji hêla Seroka Komeleya Mafên Mirovan (ÎHD) a Stenbolê Gulseren Yolerî ve hat xendin. Gulseren Yolerî di destpêke de bal kişand ser doza Dayikên Şemiyê ya ku biryara beraetê hatî dayîn û got: “Li Qada Galatasarayê çalakî lidar xistin ne sûc e. Em carek din bang li Wezîrê Karê Hindurîn Alî Yerlîkaya dikin ku bila barikatên li vir rakin.”
Gulseren Yolerî piştre serpêhatiya Yusuf Erîştî anî ziman û got: “34 sal beriya niha hat windakirin û em îro carek din li aqûbeta wî dipirsin. Yusuf Erîşti 30 salî bû hat binçavkirin û piştre tu agahî jê nehat girtin. Çend şahidan wî di bin çavan de dîtibin jî tu agahî nehatin bidestxistin. Her wiha şahid jî piştre hatin tehdîtkirin. Heta niha 30 daxwazname hat dayîn lê tu carî lêpirsîn nehat destpêkirin.
Em îro carek din bang li darazê dikin! Dev jî polîtîkayên bêcezahiştinê berdin. Derbarê dosyaya Yusuf Erîştî de lêpirsineke bi bandor bidin destpêkirin.”
