Li Parka Şar ya navçeya Qeladizê ya ser bi Îdareya Serbixwe ya Raperîn, bi beşdariya welatparêz, çalakvan û malbata wî, ciwanê bi navê Hêdî Îsmaîl ê ku tevlî seferberiya berxwedana rûmetê ya Rojavayê Kurdistanê bûbû, hat pêşwazîkirin.
Ciwanê binavê Hêdî Îsmaîl Xidir zêdetirî mehekê wek erkekê xwe yê netewî li ser banga tevlîbûna seferberiya giştî berê xwe da Rojavayê Kurdistanê û di berxwedanê de cih girt.
Derbarê beşdariya xwe ya berxwedana rûmetê ya Rojava de, Hêdî wiha got; “Em çûn Rojavayê Kurdistanê da ku ax, welat û rûmeta xwe biparêzin, nîşanî hemû cîhanê bidin ka Kurd kî ne, hêz û şiyana wan çiqase.
Peyama min ewe ku em Kurd li her deverê ku em lê bin divê alîkariya hev bikin. Wijdanê min nahêle ku ez li malê rûnim û xwişk û birayên me yên li Rojavayê Kurdistanê di bin êrişên qirkirinê de bihêlim.”
