Navenda Ragihandinê ya QSD’ê bîlançoya 24 saetên dawîn a êrîşên dewleta Tirk a dagirker û çeteyên wê, her wiha çalakiyên bersivdayînê yên şervanên QSD’ê weşand.
Daxuyaniya QSD’ê bi vî rengî ye:
“Hêzên me di çarçoveya bersivdayîna êrîşên dewleta Tirk a dagirker û çeteyên wê de, duh (În 14 Sibat 2025) li Girê Qereqozaxê buldozereke hêzên artêşa Tirk a dagirker rûxand ku stargeh di hundirê baregeha dagirkeran de ava dikir.
Eniya Bendava Tişrînê; Yekîneyên Şehîd Harûn li derdroa gundê Xerbe Zemala yê li gundewarên Bendava Tişrînê li kombûneke çeteyên dewleta Tirk a dagirker xist. Di encamê de kuştî û birîndarên çeteyan çêbûn, lê hejmara wan nehat zanîn. Şervanên me li derdora bendavê çalakiyeke din li dijî kombûnên çeteyên ku amadekariyên êrşekê li dijî şervanên me dikirin, lidarxist. Di encama vê çalakiyê de jî hejmarek çete hatin kuştin û birîndarkirin, çeteyên din jî ji qada şer reviyan.
Dewleta Tirk a dagirker bi tank û obîsên giran êrîşên xwe li ser derdora Bendava Tişrînê berdewam kirin. Balafirên bêmirov jî tevahiya şeva Pêncşemê û sibeha Înê herêm bombebaran kir. Giraniya bombebaranê li ser cihên karkeran bûn. Ji ber bombebaranê zirarên madî çêbûn.
Her wiha balafirên şer ên dewleta Tirk a dagirker du car êrîşê bajarokê Şiyûx kir. Di encama bombebaranê de ziyan gihaştin mal û milkên şêniyan. Balafirên bêmirov jî di tevahiya rojê de li ser herêmê digeriyan. Gundên derdora bajarê Kobanê jî bi obîsên giran ji aliyê dewleta Tirk a dagirker ve hatin topbebarankirin û zirarên madî li malên sivîlan bûn. Di heman demê de balafirên şer û yên bêmirov li asîmanê bajar digeriyan.”
