Îro Kampanya Jinan a Başûr ya ji bo Piştgiriya Rojava, di çarçoveya kar û çalakiyên ji bo 8’ê Adarê de, serdana cihê ku Endama Koordînasyona Kongra Star Salîhe Viyan (Hêva Erebo) û hevalên wê lê şehîd bûyîn kir.
Jinan dema serdanê de gul li cihê ku Hêva Erebo û hevalên wê lê şehîd ketîn danîn. Piştre jî li heman cihî şitil hatin çandin.
Li vê derê li ser navê jinan Çiro Şiwanî axaftinek kir, di destpêkê de şehîd Salihe û tevayî şehîdên doza azadiya Kurdistanê bibîr anî got: “Em soza şopandina xebat û têkoşîna şehîdan didin. Emê hêjayî têkoşîna wan bin û nehêlin xwîna wan li erdê bimîne.”
Piştre jî jina çalakvan Awaz Îsmaîl axivî û got: “Balafirên bê mirov ên dewleta Tirk di dema borî de gelek xebatkarên çapemeniya azad û jinên azadîxwaz hedef girt. Em li vê derê soza berdewamkirina têkoşîna wan şehîdan didin.”
Di dewamê de Awaz Îsmaîl li ser banga dîrokî ya Rêber Apo jî axivî û got: “Banga ku Rêber Apo li girtîgeha Îmraliyê kir, derfeteke dîrokî ye. Em wek xelkê Başûrê Kurdistanê bi taybetî jî jin, bi her awayî piştgiriyê didin vê pêvajoyê û pêngavan ji bo serkeftina wê diavêjin.”
Piştî axaftinan bi çandina şitlan û dirûşman dawî li çalakiyê hat.
