Şervanê QSD’ê Ramî Mihemed El Xelef ê ku 6’ê Kanûnê di encama qezeyeke trafîkê de li Tebqayê şehîd bûbû bi merasîmekê li Pakrewangeha bajarokê Hikumiyê yê Reqayê hat veşartin. Şervanê QSD’ê Macid Îbrahîm Îsa ê ku 28’ê Kanûna 2024’an de li bajarê Minbicê şehîd bûbû jî hat bibîranîn. Bi sedan şêniyên bajarê Reqayê, endam û rêveberên saziyên sivîl, QSD û Rêveberiya Xweser beşdarî merasîmê bûn.
Piştî deqeya rêzgirtinê û torana leşkerî ya şervanên Meclisa Leşkerî ya Reqayê ji fermandarên Hêzên Komandos Mehmûd Qeremox sersaxî ji malbatên şehîdan re xwest û soza şopandina rêya şehîdan û parastina destkeftiyên wan ta avakirina Sûriyeyeke demokratîk da.
Endama Meclisa Malbatên Şehîdan a Kantona Reqayê Ebîr Mihemed jî sersaxî ji malbatên şehîdan re xwest û diyar kir ku şehîdan ji bo parastina gelê xwe canê xwe feda kir. Her wiha got: “Şehîd bi bedena xwe ji nav me bar kirine, lê mîrateke mezin ku ne tê kirîn û ne jibîrkirin li du xwe hiştin.”
Di merasîmê de endamê Kongreya Îsalama Demokratîk Şêx Hisên El Elî anî ziman ku şehîd li cem Xwedê sax in ji ber ku ji bo parastina welat canê xwe didin.
Piştre wesîqeyên her du şehîdan hatin xwendin û radestî malbatên wan hatin kirin.
Di dawiyê de cenazeyê şehîd Ramî bi dirûşmên “Bi can, bi xwîn em bi te re şehîd” spartin axê.
