Partiyên Kurd ên li Rojava li hev civiyan, ji bo Konferansa Yekîtiya Neteweyî Ya Kurd gavên girîng avêtin. Beşdaran diyar kirin ku hincetên ENKS’ê heta niha didan pêş ji holê hatine rakirin û işaret bi girîngiya dema dîrokî û xurtbûna wê heyetê kir ku bi rêveberiya demkî ya li Şamê re hevdîtinê bike.
Partiyên Kurd 16’ê Adarê li Kantona Cizîrê ya Bakur û Rojhilatê Sûriyeyê li hev kom bûn û bûyerên siyasî û neteweyî, girîngiya pêkanîna konferansa Kurd li Rojava nîqaş kirin. Di dawiya civînê de jî daxuyaniyek hate dayin û hate ragihandin ku belgeya siyasî ya ku ji aliyê garantorên diyaloga navbera Kurdan hatiye amadekirin, hate nirxandin.
Ev belgename ji du belgeyên ku ji aliyê Partiyên Yekitiya Niştîmanî ya Kurd (PYNK) û partiyên derveyî her du çarçoveyan ve hatibûn pêşkêşkirin, her wiha ji formuleke ku ji aliyê Encûmena Nîştîmamî ya Kurdî (ENKS) ve hatibû pêşkêşkirin. Di civînê de biryar hate dayîn ku ev belgename ji konferansa ku tê plankirin re were pêşkêşkirin da ku were pejirandin û ev yek wê bibe mizgîniyeke mezin ji bo gelê me di Cejna Newrozê de.
Her wiha di daxuyaniyê de hat diyarkirin ku di civînê de li ser israra ENKS’ê hat rawestandin ku dixwaze civîneke taybet bi Partiya Yekitiya Demokratîk (PYD) re li dar bixe û ev tişt hat gotin: “Ji ber xîreta me ya di nav partiyên civiyayî de, ji bo gihîştina helwesteke Kurdî ya yekgirtî, em dibînin ku ew dikare civîneke bi vî rengî li dar bixe, ji ber ku her partiyeke me, di nav de PYD’ê, dikare bi her aliyekî re civînekê pêk bîne. Ji vê perspektîfê ve, em erênî nêzîk bûn ku em bigihîjin armanca xwe. Lê em diyar dikin ku ne li şûna xebatên komîteya amadekar a konferasnê ye û ne li şûna her du komîteyên diyalogê di navbera ENKS’ê û PYNK’ê de ye.”
Di dewama daxuyaniyê de hat destnîşankirin ku girîngî bi pêkanîna yekrêziya Kurdî di vê qonaxa hestiyar de heye ku Sûriye û tevahî Rojava û Bakur û Rojhilatê Sûriyeyê tê re derbas dibe.
Di heman demê de di daxuyaniyê de hat gotin ku li ser peymana di navbera QSD’ê û Şamê de nirxandin hatin kirin.
Di dawiyê de piştgiriya tam û giştî ji bo Rêveberiya Xweseriya Demokratîk bi hemû saziyên wê yên sivîl û leşkerî hat dayîn.
Alîkara Hevserokên Kongreya Neteweyî ya Kurdistanê (KNK) Hêvî Mistefa, Berdevka Partiya Yekîtiya Demokratîk (PYD) Sema Begdaş, Endamê Partiya Pêşverû ya Demokratîk Ferhad Hecî Derwêş û Sekreterê Partiya Demokrat a Sûriye-Kurdistan Ciwan Ebdilkerîm Siko li ser mijarê ji ANF’ê re axivîn.
KNK’Ê PÊŞENGÎ KIR
Hêvî Mistefa konferansa ku KNK’ê di sedsaliya Peymana Lozanê de lidar xist bi bîr xist û got, “Li vê derê ji bo avakirina yekîtiya neteweyî biryar hate dayin ku li her parçeyî karê ji bo avakirina yekîtiyê bê emşandin. Weke KNK’ê me destpêkê komîteya amadekar ava kir. Di nava vê komîteyê de nûnerên partiyên siyasî, rêxistinên civakî yên sivîl, tevgerên jin û ciwanan û malbatên şehîdan hebûn. Di asta amadekariya Konferansa Yekîtiya Neteweyî ya Kurd de li Sûriyeyê rejîma Baas hilweşiya. Bi vê pêvajoyê re ji rewşenbîran heta bi partiyên siyasî û partiyên di bin sîwana PYNK’ê de ji bo avakirina yekîtiya Kurd kar hate destpêkirin. Me biryar dan ku înîsiyatîfên van hewldanan hevpar bikin. Lewma jî komîteya amadekar berfireh bû.
HEWLDANÊN DIYALOGA BI ENK’Ê RE
Komîteya amadekar ji bo karibe hemû aliyan tevlî bike bi ENKS’ê re hewl da diyalogê dîne. ENKS negihîşt wê asta biryardanê ku beşdarî konferansê bibe. Ji ber vê yekê jî karên ji bo konferansê hêdî meşiyan, ji ber ku me dixwest hemû partiyên siyasî yên Kurd tevlî bibin. Me nexwest ti aliyekî Kurd li derveyî konferansê bimîne. Konferansa ku tê payin bê lidarxistin, hêviya tevlîbûna ENKS’ê zêde kiriye.”
DIVÊ BI FIKREKÎ HEVPAR BIÇIN ŞAMÊ
Sema Begdaş jî bal kişand ser girîngiya yekîtiya Kurd û anî ziman ku ew di demeke welê de ne ku wê paşeroja gelên Sûriyeyê diyar bike. Sema Begdaş işaret bi leza bûyeran kir û got, “Bi van pêşketinan re rola gelê Kurd ji şoreşê û vir ve li Sûriyeyê ji aliyê her kesî ve tê zanîn. Di nava vê demê de pêşengî ji projeyeke demokratîk a nenavendî re kir û karîbû bi gelên din re jiyaneke hevpar ava bike. Di vê demê de niha paşeroja gelên Sûriyeyê tê nîqaşkirin û Sûriye ji nû ve ava dibe. Di demeke bi vî rengî de gelê Kurd ê ku pêşengî ji şoreşê re kir, girînge bibe yek. Ji bo çareseriya pirsgirêka Kurd, ji bo paşeroja Sûriyeyê û garantîkirina mafên gelan yekîtiya Kurdan dîrokî ye. Gelekî girîng e ku gelê Kurd bi fikrekî hevpar biçe Şamê, mafên xwe û destketiyan biparêze û garantî bike.”
EM Ê BI HEV RE SÛRIYEYEKE DEMOKRATÎK AVA BIKIN
Sema Begdaş destnîşan kir ku bi yekîtiya neteweyî ya Kurd re wê Sûriye hîn xurt bibe û got, “Em ê bi yekîtiyê Sûriyeyeke demokratîk ava bikin. Gelê Kurd bi şoreşê re têkoşîneke mezin meşand. Di nava Kurdan, Ereban, Suryan, Ermen, Asûr û Çerkezan de yekîtî ava kir. Ev proje ji bo paşeroja Sûriyeyê çareserî ye, modeleke. Lewma gelê Kurd di paşeroja nû ya Sûriyeyê de divê bi ruhê yekîtiyê tevbigere. Bêguman yekîtiya Kurd wê bandorê li gelên din jî bike.”
Sema Begdaş destnîşan kir ku ji bo yekîtiya Kurd li Rojava pêk bîne hewldanên wan wê dewam bikin.
PIŞTÎ KONFERANSÊ KOMÎTEYEKE HEVPAR
Endamê Partiya Demokrat a Pêşverû Ferhad Hecî Derwêş jî li ser asta amadekariyên konferansê got, “Karê me yê sereke ew e ku hemû aliyên siyasî, tevgerên jin û ciwanan di konferansê de bêne temsîlkirin. Rojeva me ya esasî ya vê konferansê jî rê û rêbazên avakirina paşeroja Sûriyeyê, parastina mafên gelê Kurd li Sûriyeya nû û afirandina fikrekî hevpar. Piştî vê konferansê wê komîteyeke hevpar a ji hemû temsîliyetan bê avakirin û hevdîtin bi hikumeta Şamê re bê kirin. Weke Partiya Demokrat a Pêşverû em ji roja destpêkê ve alîgirê konferansa diyalogê ne. Ji ber nêzîkatiya ENKS’ê me hetan iha nekarî konferansa yekîtiya neteeyî pêk bînin. Armanca me ew e ku ti partiyên Kurd li derveyî konferansê nemîne, lê belê ENKS’ê heta niha biryar wernegirtiye ku tevlî konferansê bibe yan na. Em dixwazin ENKS beşdarî konferasnê bibe û li pêşiya tevlîbûna wê ti astengî nîne. Em hevîdar in ku tevlî konferansê bibin. Girîng e ku gelê Kurd bibe xwedî fikrekî hevpar. Bi vî rengî bi nêrîn û biryareke hevpar em ê li Şamê hevdîtinan bikin. Kurd bi rengekî parçebûyî biçe Şamê bi kêrî Kurdan nayê. Bi temsîliyetekê çûyîna Şamê wê gelê Kurd xurt bike.”
KONFERANS DIKARE 20’Ê ADARÊ PÊK WERE
Sekreterê Partiya Demokrat a Sûriye-Kurdistan Ciwan Ebdulkerîm Siko ragihand ku di pêkanîna yekîtiya Kurd de derengbûyîn heye û got, “Ji bo parastina destketiyên gelê Kurd divê teqez yekîtî pêk were. Ji bo yekîtiyê jî hewldan hate kirin. Konferansa Yekîtiya Neteweyî ya Kurd ji bo beriya Newrozê di 20’ê Adarê de pêk were em hewl didin. Bi ruhê yekîtiya Kurd em dixwazin Cejna Newrozê pêşwazî bikin.”
HINCET JI HOLÊ HATIN RAKIRIN
Ciwan Ebdulkerîm Siko diyar kir ku ji bo pêkhatiya yekîtiya Kurd gelekî hewl hate dayin û got, “ENKS’ê dixwest yekser bi PYD’ê re civînê pêk bîne. Tiştekî asayî ye ku her partiyeke siyasî bi hev re hevdîtinê bike. Komîteya amadekar a ji nûnerên hemû partiyên siyasî yên Kurd diyar kir ku mafê hemû partiyan e ku bi hev re civînê bikin. Bi vî rengî hinceteke ENKS’ê ji holê hate rakirin.”
DI PAŞEROJA SÛRIYEYÊ DE WÊ WEZÎFEYEKE MEZIN HILDE SER XWE
Ciwan Ebdulkerîm Siko destnîşan kir ku konferans wê di avakirina Sûriyeyê de wezîfe û berpirsyariyên girîng hilde ser milê xwe û got, “Konferans wê bibe gaveke mezin. Konferans wê bibe garantiya Sûriyeya ewle û aram. Bi konferansê re wê mafên gelê Kurd garantî bibin. Her wiha wê bi yekîtiya Kurdan re yekîtiya gelan jî xurt bibe. Di nava şert û mercên asayî de konferans wê 15’ê Çileyê pêk bihata, lê em hêvî dikin di 20’ê Adarê de pêk were.”
