Rêxistina Partiya Wekhevî û Demokrasiyê ya Gelan (DEM Partî) a Semsûrê namzetên xwe yên hevşaredariyê yên navenda bajar, navçe û bajarokên wê eşkere kir. Ji bo eşkerekirin û danasîna namzetan li eywaneke dawetan a li Karapinarê bername hat lidarxistin. Li eywanê alên partiyê û pankarta “Rabe Dem hat” hatin daliqandin. Tevî namzetên hevşaredariyê, endamên saziyên civaka sivîl ên bajêr û gelek kes beşdarî bernameya danasînê bûn.
Bername bi deqeyek rêzgirtina ji bo kesên di têkoşîna demokrasî û azadiyê de jiyana xwe ji dest dane destpê kir. Piştre Hevserokên DEM Partiyê yên Semsûrê Yeşîm Camcî û Huseyîn Coşkun axivîn. Hevserokan di axaftinên xwe de bal kişandin ser “Meşa Mezin a Azadiyê” ku bi daxwaza azadiya fîzîkî ya Rêberê Gelê Kurd Abdullah Ocalan û çareserkirina pirsgirêka kurd bi rêyên demokratîk hatiye destpêkirin û meşvan silav kirin. Hevserokan gotin ku dê di hilbijartinên 31’ê adarê de bi ser kevin û li Semsûrê jî şaredariyên gel ava bikin.
Piştî axaftinan, namzetên hevşaredariyê hatin eşkerekirin û yek bi yek hemû namzet li ser dikê hatin vexwendin.
Namzetên hevşeredariyê yên Semsûrê wiha ne:
NAVENDA SEMSÛRÊ
* Turkan Erkenek
* Bahattîn Bîlgîn
NAVÇEYA ŞEMÎZÎNAN
* Yasîn Ertan
NAVÇEYA KOLIKÊ
* Osman Ozbek
NAVÇEYA SERGOLANÊ
* Ergun Varhan
NAVÇEYA BÊHIŞTÎ
* Mûstafa Sular
NAVÇEYA TÛTÊ
* Îsmet Coşkun
BAJAROKÊ BULAMÊ
* Kamîle Ocak
* Huseyîn Uzun
BAJAROKÊ KOMIRÊ
* Mahmût Kapçak
* Bedriye Polattaş
BAJAROKÊ BALYANÊ
* Mehmet Kusele
Namzetê hevşaredariyê yê Bajarê Semsûrê Bahattîn Bîlgîn di danasînê de axivî. Bîlgîn, bal kişand ser karesata erdhejê ya navenda wan Mereş e û got ku encama xemsarî û polîtîkayên îktîdarê ye. Bîlgîn, anî ziman ku ew ê hesaba vê ji berpirsyaran bipirsin.
Bername piştî danasîna hevşaredaran bi dawî bû.
