Li Şengalê ji aliyê Saziya Malbatên Şehîdan ve merasîmek ji bo bîranîna şehîdên mehên Îlon û Cotmehê hate lidarxistin. Bîranîn, li Goristana Şehîd Dilgeş û Şehîd Berxwedan a li ser Çiyayê Şengalê pêk hat.
Di bîranînê de şervanên ku di dîrokên cûda de ku li dijî çeteyên DAÎŞ’ê û di êrîşên dewleta Tirk de şehîd bûne, hatin bîranin.
Merasîm bi tevlîbûna endamên sazî û rêxistinên civaka Êzidî û Ereb, tevî rûspî û kesayetiyên civakê, bi deqeyek rêzgirtinê ji bo bîranîna ruhê hemû şehîdan destpê kir. Piştî deqeya rêzgirtinê, ji aliyê dayikên şehîdan ve mûm hatin pêxistin û paşê axaftin hatin kirin.
Rêber Feqîr li ser navê Fermandariya YBŞ û YJŞ’ê axivî û di şexsê Dîndar Avesta de hemû şehîd bibîr anîn û got: “Yên ku xwîna xwe di axa Şengalê de rijandin, ji bo me sembola berxwedan û fedakariyê ne. Wan ne tenê Şengal rizgar kirin, lê di heman demê de ruhê berxwedanê di nava civaka Êzidî de jî geş kirin. Bi saya wan îro Êzidî dikarin li ser axa xwe bi azadî bijîn û nasnameya xwe biparêzin. Bîranîna wan, ji bo me bîranîna êş û azarên mezine. Lê di heman demê de bîranîna hêz û berxwedana me jî ye. Gerek em wek civak li bîranîna wan xwedîd erkevin û xeyalên wan pêk bînin. Ji bo ku em karibin li vê derê bijîn, wan canê xwe fedakirin.”
Rêber anî ziman ku xwedî derketina li bîranîna şehîdan, tê wateya xwedî derketina li nirxên ku wan canê xwe ji bo wan feda kirin û wiha berdewam kir: “Ev tê wateya ku em piştgirî bidin malbatên şehîdan û her dem li kêleka wan bin. Emê tu carî şehîdên xwe jibîr nekin. Ewê her dem di dil û mejiyê me de bijîn. Soza me ji wan re ewe ku emê Şengalek xweser û azad ava bikin.
Li ser navê Saziya Malbatên Şehhîda a Şengalê jî Berfê Elyas jî axivî û diyar kir ku bi keda şehîdan, wan civaka Êzidî ya Şengalê ji fermanê rizgar bû û bi saya wan ew niha dikarin li Şengalê bijîn.
Merasîm piştî axaftinan bi nîşandana sînevîzyonek li ser jiyana şehîdan û bi dirûşmeyên “Şehîd Namirin” bi dawî bû.
