Di çarçoveya çalakiyên 8’ê Adarê de bi pêşengiya Komeleya Piştevaniyê ya bi Malbatên Girtî û Hikumxwaran re (TUHAY-DER) û Tevgera Jinên Azad (TJA) li pêşiya Kampusa Girtîgeha Wanê daxuyanî hate dayîn. Gelek nûnerên saziyan û xizmên girtiyan tevlî daxuyaniyê bûn. Di daxuyaniyê de dirûşmeyên “Jin jiyan azadî” û “Bijî berxwedana zindanan” hatin berzkirin.
Endamê Meclîsa Şaredariya Tûşba ya DEM Partiyê Mizgîn Arcaş diyar kir ku banga “Aştî û Civaka Demokratîk” a Rêber Apo bûye hêvî û wiha got: “Ev bang ne tenê ji bo gelê Kurd, ji bo hemû gel û jinan xwedî wateyekî mezin e. Avakirina civakekî demokratîk a li ser bingeha azadîxwaziya jinê pêwîstiya vê bangê ye. Avakirina civakekî ku jin û tevahî gel bi nasnameyên xwe bi azad bijîn û mafên xwe biparêzin, bi dawîkirina tecrîdê re pêkan e.”
Daxuyanî bi dirûşmeya “Bijî berxwedana zindanan” bi dawî bû.
GEVER
Tevgera Jinên Azad (TJA) di çarçoveya 8’ê Adarê Roja Jinên Cîhanê de li Salona Dawetê ya Tekçe ya navçeya Gever a Colemêrgê şahiyek bi coş li dar xist. Gelek jin beşdarî çalakiya ku hunermend Mizgîn Turan derket ser dikê bûn. Di destpêka şahiyê de peyama Hevşaredara Geverê Remziye Yaşar a ku li Girtîgeha Girtî ya Tîpa T a Xarpêtê girtî û qeyûm li şûna wê hat tayinkirin, bi taybet ji bo 8’ê Adarê hat xwendin.
Hevseroka DEM Partiyê ya bajêr Humeyra Armût jinên beşdarî çalakiyê bûn silav kir û 8’ê Adarê Roja Jinên Kedkar ên Cîhanê pîroz kir. Di axaftina xwe de bal kişand ser “banga sedsalê” ya di 27’ê Sibatê de hat weşandin û bal kişand ser rola jinan a di têkoşîna aştiyê de.
Hevşaredara Geverê Şadiye Kirmizigul di axaftina xwe de bal kişand ser ruhê têkoşîn û hevgirtinê yê 8’ê Adarê û bal kişand ser pêwîstiya rêxistinbûn û hişyarkirina jinan.
Parlamentera DEM Partiyê ya Colemêrgê Oznûr Bartîn, diyar kir ku piştî 27’ê Sibatê Kurdan dîrokeke nû nivîsandin û diyar kir ku di şexsê Rêberê Gelê Kurd Abdullah Ocalan de pêvajoyeke nû hatiye destpêkirin. Oznur Bartin got, “Em weke jin divê peyama Birêz Ocalan hembêz bikin û li her qadê xwe bi rêxistin bikin. Jinan li her qadê têkoşîn dane û didomînin. Jin bi salan e tevî hemû polîtîkayên tundiyê li ber xwe didin û ji bo azadiyê têdikoşin. Dema jin azad bibe civak jî azad dibe. Bi minasebeta 8’ê Adarê em ê careke din bi stran, reng, sirûd û çanda xwe li qadan bin. Roja têkoşîna me pîroz be.”
Piştî axaftinan jinan bi stranên hunermend Mizgîn Turan govend gerandin.
ÎDIR
TJA’yê li navçeya Qulp a Îdirê di çarçoveya 8’ê Adarê de şahiyek lidar xist. Şahî li avahiya DEM Partî ya navçeyê hate lidarxistin. Rêveberên DBP, DEM Partî û gelek jin tevlî bûn. Hevşaredara Îdirê Nejla Kum di şahiyê de axivî û wiha got: “Jinan ji dîrokê ve her tim serî li hemberî desthilatdariyê rakirin. Roja jinan a cîhanî ya me hemûyan pîroz be.”
Piştre Hevşaredara Xelfelî ya Îdirê Yildiz Tendîk Parîn wiha got: “Em wekî jinan bi salan berdelên herî giran dan û hîna jî têdikoşin. Em van qebûl nakin û di 8’ê Adarê de serhildana xwe mezin dikin.”
