Li dijî tayînkirina qeyûm a li Şaredariya Sêrtê, her hefte daxuyanî tê dayîn. Rojeva vê hefteyê ya daxuyaniyê, berxwedana li Wanê ye. Qelebalixa ku li ber şaredariyê kom bûyî, pankarta “Ji Sêrtê ji bo Wanê silav, berxwedan didome” vekir. Girseyê dirûşmeyên “Em ê bi berxwedanê bi ser bikevin” û “Na ji qeyûmê re, îrade ya me ye” berz kir û nerazîbûn nîşanî polîtîkaya qeyûm da.
Hevşaredarê Sêrtê Mehmet Kaysî diyar kir ku ew îradeya gelê Wanê silav dikin.
Hevserokê DEM Partiyê yê Sêrtê Eşref Tekîn jî anî ziman ku desthilatdarî tehemûlê îradeya gel a ji bo hilbijartinê nake.
Daxuyanî bi berzkirina dirûşmeya “Bijî berxwedana Wanê” bi dawî bû.
RIHA
Cezayê hefsê yê 3 sal û 9 mehan ku li Hevşaredarê Bajarê Mezin ê Wanê Abdullah Zeydan hate birîn û hewldana tayînkirina qeyûm, li Rihayê hate protestokirin. Rêxistinên DEM Partî, DBP û TJA’yê li ber avahiya Rêxistina DEM Partiyê ya Bajar daxuyanî dan. Parlamenterê DEM Partiyê yê Rihayê Omer Ocalan, endamên Meclisa Dayikên Aştiyê, pêkhateyên Platforma Ked û Demokrasiyê ya Rihayê û gelek kes tevlî daxuyaniyê bûn. Di daxuyaniyê de pankarta “Ne qeyûm demokrasî” hate hilgirtin. Di daxuyaniyê de ji ewil aktîvîsta TJA’yê Edle Fîdan axivî û got ku ew bi xelkê Wanê re ne û ev tişt anî ziman: “Hûn dê nekarin bi rêya qeyûman bi vî gelî paşvegavê bidin avêtin.”
Parlamenter Omer Ocalan jî anî ziman ku ew bi sala ne li dijî bêhiqûqtiyê li ber xwe didin û wiha got: “Qeyûm, siyaseta tesfiyekirinê ye. Îktîdar pêşiya yên dibêjin ‘em bi siyasetê çareser bikin’ digire. Ev nakokî ye. Divê AKP biryara xwe bide. Divê bibêje ku bi çareseriyê re ye. Gelê Kurd ev sedsal in li ber xwe dide û dê li ber xwe bide. Gelê Wanê ji bo xwedîderketina li vîna xwe û protestokirina siyaseta qeyûm li kolanan li ber xwe dide. Siyaset, bi komkujî û tayînkirina qeyûman nabe. Gelê Kurd li ser pêya ye û dê têkoşîna xwe bidomîne. Em jî dê biisrar demokasiyê biparêzin. Dê demokrasî bi ser keve.”
Daxuyanî bi dirûşma “Bijî berxwedana Wanê” û bi çepikan bi dawî bû.
SÊWEREG
Li navçeya Sêwereg a Rihayê DEM Partî, DBP û TJA li parka Lezgo çalakî hate lidarxistin. Di daxuyaniya hatî dayîn de, pankarta “Qeyûm xesp e, rê ji xespê re nîne” hate vekirin û dirûşmeya “Berxwedan li her derê ye, rê ji qeyûman re nîne” hate berzkirin.
