Li navçeya Silopiya ya Şirnexê bi pêşengtiya TJA’yê û bi dirûşma “Em li dijî qirkirina jinan serî radikin û ber bi azadiyê ve dimeşin” mitîng hat lidarxistin. Mitîng, li Qada Newrozê hat lidarxistin. Jinên Botanî yên bi cilên reng bi reng tevlî mitîngê bûn, dirûşma “Jin, jiyan, azadî” berz kirin. Polîsan, li noqteyên kontrolê bi hinceta “qedexeyê” dest danîn ser flamayên bi rengên kesk, sor û zer. Jinên li qada mitîngê dovîzên “Jiyan bi zana xweşik e”, “Jin, jiyan, azadî” û “Ber bi 8’ê Adarê ve” hilgirtin.
Mitîng, bi govend û dirûşman dest pê kir.
Di mitînge de ewilî Hevseroka DEM Partiya Şirnexê Taybet Bîlgîn axivî. Taybet Bîlgîn anî ziman ku ew 8’ê Adarê li hemû jinên li qadan li ber xwe didin pîroz dike û got: “Hêvî dikim ew roj bibe bingeha jiyaneke azad.”
‘HÊVIYÊN ME ZÊDE NE’
Parlamentera DEM Partiyê ya Şirnexê Newroz Uysal Aslan jî bi lêv kir ku 8’ê Adarê herî zêde li yên ji bo aştiyê li ber xwe didin pîroz be. Newroz Uysal Aslan, got: “Bila çavê wê li deklarasyona birêz Abdullah Ocalan be. Em ji xwe bawer bin. Hêviyên me zêde ne.”
Aktivîsta TJA’yê Fatma Ablay jî diyar kir ku jin li qadan dîrokê dinivisînin û wiha got: “Di 8’ê Adarê de jî li qadan in. Îsal 8’ê Adarê bêhtir watedar e. Bi pêşengiya jinan daxwaza azadî û banga civaka demokratî heye. Em li vir silaveke germ li Îmraliyê re dişînin. Hezar silav ji birêz Abdullah Ocalan re ku wî felsefeya azadiya jinan ava kiriye. Em 8’ê Adarê li hemû jinên ku dixebitin û nekarînê werin li vir jî pîroz dikin. Têkoşîna jinan wê her dem bidome. Dem dema azadiya jinan e. Di 27’ê Sibatê de bangawaziyeke dîrokî hat dayîn. Çavê hemû dinyayê jî li bangawaziya birêz Abdullah Ocalan bû. Divê ji bo têkoşîna çareserkirina pirsgirêka Kurd di pêşengiya jinan de pêk were. Em jin li dijî şer û şerê taybet divê bi rola xwe rabin. Îro li bajarên Kurdistanê bi şerê taybet ve dixwazin jinan bixînin. Bi destê çawişên pîspor û polîsan dixwazin jinên Kurd têrî tiryakê bikin û bi kuştinê re rû bi rû bihêlin. Divê li dijî vê şerî taybet têkoşîna xwe mezintir bibe. Birêz Abdullah Ocalan berpirsyariyeke pir mezin daye ser milê jinan. Dibêje ‘Heta jin azad nebe civak azad nabe.’ Ji ber wê divê jin di vê pêvajoyê de rolê bigirin ser xwe. Heke aştî û azadî were wê bi destê jinan were. Em bi Rêberê Gelê Kurd birêz Abdullah Ocalan û hêza xwe bawerin. Dîroka me di têkoşîna jinên azad de derbas dibe. Hezar silav jî ji jinên di heps û zindanan de ne.”
Hevseroka Giştî ya DBP’ê Çîgdem Kiliçgun Uçar jî di mitîngê de axivî. Çîgdem Kiliçgun Uçar, bi zaravayê Kirmanckî dest bi axaftina xwe kir û got: “Îro dengê me yê li vir dengê dayika Taybet, Fatma Yuksel û Sêvêyan e. Em bi qirkirina jinan re rû bi rû ne. Her roj li Kurdistan û Tirkiyeyê jin tên qetilkirin. Jin ji aliyê pergala mêrperest û hişê netew dewletê ve tên qetilkirin. Em li dijî vê yekê bi felsefeya ‘Jin jiyan azadî’ li qadan in. Li Kurdistanê yek ji polîtîkaya desthilatê ew ku tunehesibandina vîna jinan e. Li Kurdistanê jin bîra têkoşîna civakê ye. Li Şirnexê zarokek 15 salî ji aliyê parêzvanê Walî vê rastî destdirêjayiyê hat. Lê ew kes nehat girtin. Li Kurdistanê desthilat ji bo jinan ji têkoşînê dûr bixe wan bêbîr dihêle. Lê Botan jinên têkoşer ji bîr nekir û ji bîr nake. Hemû jinên ciwan ên li vir yek jî pêşeroja vê têkoşînê ne. Nikarin pêşiya van jinan bigrin.
DIVÊ HER KES XWEDÎ LI BANGA OCALAN DERKEVE
Di 27 Sibatê de banga birêz Abdullah Ocalan li hemû dinyayê deng veda. Birêz Abdullah Ocalan li dijî înkarina gelan a pergala netewa demokratîk bang li civaka demokratîk kir. Em li Botanê bang li jinên Botanê dikin; vaye hûn hene em dixwazin hûn piştgiriya banga aştî û civaka demokratîk bikin. Azadiya jinan bi civaka demokratîk pêkan e. Ji ber wê jî ev bang ji bo azadiya jinan e jî. Ev bang di rojekê de nehatiye kirin. Ew bang encama têkoşîna 50 salî ya gelê Kurd e. Em bang li hemû jinan dikin ku xwedî li vê bangê derbikevin. Di vê bangê de ji bo hemû gelan başî û aştî heye. Çareseriya krîzên heyî ye. Muxatabe vê bangê ne tenê gelê Kurd e. Muxatabê vê hemû kes e. Divê em jî li her derê vê bangê ji gel re taybet ji jinan re vêbibêjin. Birêz Abdullah Ocalan banga pêşengiya siyasetê ji jinan re dike. Me bi siyaseta demokratîk pir tişt bi dest xist. Lê hemû destkêftiyên me ji aliyê dewleta mêrperest ve dibin hedef. Em li dijî qirkirina jinan ber bi azadiyê ve diçin. Şerê ku li ser Kurdistanê tê ferzkirin bi banga birêz Abdullah Ocalan hat pûçkirin. Jinên ku li Rojava destan nivisîsandin, dîrokeke nû dinivisînin. Bijî 8’ê Adarê, bijî jin jiyan azadî.”
Piştî axaftinan hunermend Xecê derket ser dikê û stran gotin. Mitîng bi gerandina govendê bi dawî bû.
