Malpera Siwêyda Press ku xwe spartibû çavkaniyên taybet da zanîn ku 3 gorên komî hatine dîtin û di wan goran de bi dehan sivîlên Siwêdayê yên ku di êrişên hêzên hikumeta veguhêz a Sûriyeyê de hatine qetilkirin, hatibûn veşartin.
Li gorî çavkaniyan, gora herî mezin li herêma Ezra ya gundewarê rojhilat ê Derayê bû, di gorê de nêzî 50 cenazeyên ku bi awayekî bêserûber hatibûn veşartin, hebûn. Şahidan da zanîn ku ji wan cenazeyan birîndar hebûn ku li nêzî nuqteya tibî ya herêma Besra El Herîr hatibûn înfazkirin.
Malperê diyar kir ku wan wêneyên cenazeyan beriya ku werin definkirin wergirtine. Li gorî malperê, cenazeyên din di gorên komî yên li Necha û Edra yên gundewarê Şamê di bin çavdêriya “Navenda Naskirina windayan” de hatin veşartin. Ji wan cenazeyan 39 rizî bûne, ji bilî şopa diranan nayên naskirin, heta ku laboratuwarên DNAˊê tên aktîvkirin.
Birayê qurbaniyekî ji bajarokê Necran ji malperê re diyar kir ku “Navenda Naskirina Windayan” hejmara cenazeyê birayê wî jê re gotiye, lê ji bo derxistina cenazeyê wî û gihandina Siwêdayê 14 mîlyon lîreyên Sûriyeyî xwestine.
Li gorî peymanên Cinêvê û pergala Romayê ya Dadgeha Cînaî ya Navneteweyî ev rêbaz wekî sûcên şer tên naskirin. Li gorî madeya 17’an a peymana 4’emîn a Cinêvê divê aliyên dijber cenazeyan bi rûmet veşêrin, nasnameyên wan diyar bikin û agahiyê bidin malbatên wan.
Ev qanûn jî di gorên komî yên ku hatine dîtin de, nehatin pêkanîn, vê yekê hişt ku mijara edaletê li Sûriyeyê piştî hilweşîna rejîma Baasˊê girêktir bibe.
