Yek ji Welatparêzên ji Bajarê Kobanê ku berê xwe du caran daye Bendava Tişrînê Omer Elûş e. Omer Elûş ji ANF’ê re axivî û qala kêlî û bîranînên xwe yên li wir û qala berxwedaniya gel a li hemberî êrîşên dagirkeriyê kir.
Omer Elûş di destpêka axaftina xwe de wiha got: “Dema em cara destpêkê çûn Bendava Tişrînê, li ser rê em rastî gelek êrîşên dewleta Tirk ên nemerdane hatin. Ruxmî gelek êrîşên dijwar jî dîsa em bi berxwedaniyekê û israreke mezin ber bi bendava Tişrînê ve herikîn û em gihîştin bendavê. Gelê me û şervanên me yek ruh e, em li wir bûn, şervanên me jî li dijmin dixistin. Me êdî biryara xwe da, yan mirin, yan jî mayîn û em li wir bûn. li dora me balafirên şer û bê mirov. Obus û hewanan bê navber lê dida. Me nizanîbû ku gelo em careke din vegerin an na. Li wir jiyaneke dine, tijî berxwedaniye, aliyekî topbarana dagirkeriyê, aliyê din jî dîlana serkeftinê ye.”
‘TIŞRÎN BÛYE DESTANA DERWÊŞÊ EVDÎ’
Omer anî ziman ku di dilê gelê ku berê xwe dide bendavê û li hemberî dagirkeriyê disekine de soza tolhildanê heye û wiha pêde çû: “Me li dijî çeteyên DAÎŞ’ê şer kir û ew teror têk bir. Em li vir bêkehrebe û bêav in. Me berê xwe da bendava xwe da ku em bikaribin, av û kehrebeya xwe biparêzin, ruxmî wê jî, aliyekî me êrîş bûn, aliyekî me stran bûn. Bendava Tişrînê bûye destana Derwêşê Evdî, her şervaneke xort li wir bûye Derwêş, her şervaneke jin jî bûye Edûl. Berxwedanî esas e, mutleq em ê bi ser bikevin.”
‘DIVÊ GELÊ KURD RABE SER PIYAN’
Omer di dawiyê de destnîşan kir ku ew ê bi ser bikevin û ew ji mirinê mezintirin û wiha got: “Şoreşa li Kobanê destpê kirî, li Tişrînê ber bi serkeftinê ve diçe, şervanên me yên ber bi çeperên şer ve diçin û derbeyên giran li dagirkeriyên dixin, bi ser ketine. Ti kes nikare me tune bike. Banga min ji bo tevahî kesên ku qala mirovahiyê û demokrasiyê dikin, divê êdî li hemberî vê dagirkeriyê xwedî helwest bin, divê êdî em Rêberê xwe di nava xwe de bibînin. Em ê bi ser bikevin, divê gelê Kurd rabe ser piyan.”
