Meclîsa Ciwanan a DEM Partiyê li Wanê bi çalakiyekî kadroyên pêşeng ên PKK’ê Riza Altûn û Alî Haydar Kaytan bi bîr anîn. Bîranîn li Avahiya DEM Partî ya Bajêr hate lidarxistin û gelek welatî tevlî bûn.
Çalakî li baxçeya ku wêneyên Altûn û Kaytan hatibûn daleqandin hate lidarxistin. Beşdaran gelek caran dirûşmeyên “Şehîd namirin” û “Bijî Serok Apo” berz kirin û pankartên bi nivîsên “Di şopa derwêşên demê de wê jiyana azad pêk were” û “Wesîyeta kesên ku rê li ber ronahiyê vekirine: her bi pêş ve” hatin daleqandin.
Bîranîn bi deqîqeyekî rêzgirtinê destpê kir û sirûda Çerxa Şoreşê hate xwendin. Piştre sînevîzyona li ser jiyan û mîrateya têkoşînê ya Altûn û Kaytan hate xwendin.
Di çalakiyê de Hevseroka DEM Partî ya Wanê Gonul Ûzûnay axîvî û destnîşan kir ku gelê Kurd bi dehan sal in rastî zexta sîstematîk û polîtîkayên asîmîlasyonê tên. Ûzûnay destnîşan kir ku ev polîtîka bi taybet li erdnîgariya Kurdistanê hatine kûrkirin û wiha got: “Gelê Kurd ku li hemberî ev qas zext û asîmîlasyonan li ber xwe didin, di serî de bi felsefeya Birêz Abdullah Ocalan xwe îspatê hemû cîhanê kiriye. Tu gelê din nedikarî li hemberî ev qas êrîşên giran û polîtîkayên îmhayê li ber xwe bidin. Lê gelê Kurd bi hêza xwe ya exlaqî û polîtîk karî ku hemû êrîşan berteref bike.”
Bîranîn piştî xwendina helbestên Alî Haydar Kaytan û stranên Koma Aryen bi dawî bû.
