Di daxuyaniya Wezareta Tenduristiyê de hate gotin, di êrîşên Îsraîlê yên 24 saetên dawî de herî kêm 58 kesan jiyana xwe ji dest dan, 308 kes jî birîndar bûn.
Hate ragihandin ku ji 7’ê Cotmeha 2023’an û vir ve 62 hezar û 744 kes di êrîşan de hatin kuştin.
Li gorî daxuyaniyê ji kesên jiyana xwe ji dest dan 28 kes dema ku hewl dan paketên alîkariyê werbigirin hatin kuştin û di êrîşan de her wiha 184 kes jî birîndar bûn.
Tê gotin, di rêza belavkirina alîkariyê de heta niha 2.123 kes hatin kuştin, 15.615 kes jî birîndar bûn.
JI BIRÇÎBÛNÊ 11 KESÊN DIN MIRIN
Di nava 24 saetên dawî de 11 kesên din ji birçîbûnê mirin ku 2 ji wan zarok bûn. Ji Cotmehê û vir ve 300 kes ji birçîbûnê mirin ku 117 ji wan zarok bûn.
Li gorî nûçeya El Cezîre jî di du êrîşên li ser Nexweşxaneya Nasser a li Xan Yûnisê de 19 kes mirin, bi dehan kes birîndar bûn.
Li gorî Parastina Sivîl ji kesên jiyana xwe ji dest dan 4 jê rojnamevan bûn.
ÎSRAÎLÊ LÊPIRSÎN DA DESTPÊKIRIN
Artêşa Îsraîlê ragihand ku têkildarî êrîşa li nêzî Nexweşxaneya Nasserê ‘lêpirsîna destpêkê’ hatiye destpêkirin. Artêşê diyar kir ku ji ber zerara li sivîlan bûye ‘ew xemgîn in’ û îdîa kir ku rojnamevan nebûne hedefa êrîşê.
