Îro li Zanîngeha Kobanê 1029 xwendekar dest bi ezmûnên werza yekemîn kirin û wê heta du hefteyan ezmûn dewam bike. Xwendekaran ezmûnên peymangehê Zagon û Rêveberî (Zagon û Rêveberî), peymangeha Jimaryarî (Jimaryarî), Peymangeha Beşa Ragihandin (Ragihandin), Fakulteya Mafnasî (Mafnasî), Paymangeha Bijîşkî (Temrîd, Texdîr, Mexber, Dermanasî), Peymangeha Perwerdeyî (Erdnîgarî, Zimanê Îngilîzî), Fakulteya perwerdeyî (Mamosteyê Refê) kirin.
Têkildarî ezmûnan xwendekaran ji ANF`ê re axivîn. Xwendekara Beşa Wêjeya Erebî Sîdra Misî, anî ziman ku ew ê heta dawiyê xwendina xwe dewam bikin û got, “Me îro ezmûnên xwe yên yekem pêk anî. Em ezmûnên xwe dikin û xwendina xwe jî dewam dikin. Dewleta Tirk dixwaze bi van êrîşan re me dûrî xwedinê bike, lê em ê heta dawiyê xwedî li xwendina xwe derkevin.”
Xwendekara Beşa Biyolojî Şêrîn Elî, jî diyar kir ku tevî êrîşên dewleta Tirk a dagirker û çeteyên girêdayî wê yên dijwar ên li ser herêmê jî, ew hewl didin xwendina xwe bi awayekî serketî bidomînin.
