Li Bakurê Kurdistanê û Tirkiyeyê pêvajoya aştî û civaka demokratîk tê meşandin. Bandora vê pêvajoyê li ser her çar parçeyên Kurdistanê û Rojhilata Navîn heye. Çavdêrê siyasî û analist Loqman Hesen ji ANF’ê re axivî û diyar kir ku serketina pêvajoyê ji bo her çar parçeyên Kurdistanê girîng e. Hesen got, di pêvajoya aştî û civaka demokratîk de qonaxeke girîng hate derbaskirin.
‘PÊVAJOYA AŞTIYÊ JI ŞER ZEHMETTIR E’
Loqman Hesen diyar kir ku pêvajoya aştî û civaka demokratîk a li Bakurê Kurdistanê û Tirkiyeyê rasterast bandorê li her çar parçeyên Kurdistanê û siberoja Rojhilata Navîn dike û destnîşan kir ku serketina pêvajoyê çawa ji bo Kurdan girîng e, ji bo Tirkiyeyê jî xwedî girîngiyeke dîrokî ye.
Hesen anî ziman ku Rêber Apo her tim pêşengê aştî û demokrasiyê ye û got, “Şer dibe bi biryara aliyekê re destpê bike, lê aştî yekalî nabe, pêvajoyeke hîn tevilhev û zehmettir e û îradeyeke taybet dixwaze. Birêz Ocalan ev ne cara ewilî ye hewldanên ji bo aştiyê dide destpêkirin, têkoşîna wî, îdeolojî û fikra wî li ser esasê felsefeya aştiyê ye. Ocalan hem li derve hem jî li Îmraliyê her tim ji aştiyê re amade bûye. Mîna ku her tim dibêje, ‘Em xwedî hemû hêza cîhanê jî bin em êrîşî ti kesê nakin; lê em nahêlin ti kes jî êrîşî me bike’. Ev nêzîkatî birêz Ocalan kiriye mîmarê pêvajoya aştiyê.”
‘HETA KU PIRSGIRÊKA KURD ÇARESER NEBE, DEWLETÊN HERÊMÊ ARAMIYÊ NABÎNIN’
Hesen diyar kir ku heta ku pirsgirêka Kurd çareser nebe, Tirkiye û dewletên din ên herêmê aramiya mayînde nabînin û destnîşan kir ku gelek pirsgirêkên Tirkiyeyê hene, lê pirsgirêka Kurd a herî bi kok û diyarker e.
Hesen anî ziman ku meşandina pêvajoyê li ser gotina ‘Tirkiyeya bêteror’ şaş e û bilêv kir ku ew vê pêvajoyê weke pêvajoya jiyana hevpar û entegrasyona demokratîk dibînin.
Hesen bal kişand ser zextên li ser Tirkiyeyê ji bo ku ji Rojava vekişe û ev tişt got, “Tirkiye dixwaze li Rojava mayînde bimîne, lê belê hebûna wî ya leşkeri di bin gefê de ye.”
‘BIRÊZ OCALAN MUXATABÊ AŞTIYÊ YE’
Loqman Hesen axaftina xwe wiha temam kir: “Serdana li Îmraliyê hatî kirin û hevdîtina rasterast a bi Rêber Apo re, nîşan dide ku ew nûnerê esas ê meseleya Kurd e. Çûyîna Komîsyonê ya Îmraliyê û girtina nêrîna Ocalan, destpêka demeke nû ye. Ev gaveke rewa, dîrokî û watedar e. Nîşan dide ku Birêz Ocalan aktorekî xwedî îrade, muxatabê aştiyê û nûnerê esas ê meseleya Kurd e.”
