Komên girêdayî hikumeta demkî û dewleta dagirker a Tirk destdirêjî li pakrewangehên şehîdan li Reqa, Şedadê û Dêrazorê kir.
Der barê mijarê de Meclisa Malbatên Şehîdan a Kobanê bi daxuyaniyekê nerazîbûna xwe li hember van binpêkirinan anî ziman.
Daxuyanî li Pakrewangeha Şehîd Dîcle ya Kobanê, bi amadebûna endamên meclisê û xizmên şehîdan ji hêla endama meclisê Hîba Mamo ve hat xwendin.
Meclisê hemû şehîd bi bîr anîn û destdirêjiya li ser pakrewangehên şehîdan şermezar kir. Meclisê ev yek wek binpêkirina pîroziya şehîdan û bêrêziya li nirxên mirovan nirxand. Daxuyaniyê her wiha diyar kir ku destdirêjiya li ser gorên şervanên Hêzên Sûriyeya Demokratîk hewldaneke ji bo têkbirina mîrateya têkoşîn û fedakariya deh salan a şerê li dijî DAIŞ’ê ye.
Di daxuyaniyê hat gotin ku rûmeta şehîdan xeta sor e. Her wiha bêdengiya navneteweyî ya li hember van sûcan rexne kir û bang li civata navneteweyî û rêxistinên mafên mirovan kir ku berpirsiyariyên xwe di çavdêrîkirin û belgekirina van bûyeran de bigirin ser xwe.
Mecisa Malbatên Şehîdan daxwaza avakirina komîsyoneke lêpirsînê ya navneteweyî ya serbixwe kir da ku hesab ji berpirsyaran were pirsîn.
