Di 28’ê Tebaxa 2022’yan de Suhêl Xurşîd ku wek Mamoste Şemal tê naskirin û Endamê Desteya Rêveber a Tevgera Azadiya Kurdistanê bû, li ber mala xwe ji aliyê dewleta Tirk a dagirker ve hate qetilkirin. Têkildarî vê yekê Endamê Desteya Rêveber a Tevgera Azadiya Kurdistanê Cuma Kerîm ji ANF’ê re axivî.
Cuma Kerîm di destpêka axaftina xwe de di kesayetiya Mamoste Şemal de hemû şehîd bi bîr anîn û got: “Di duyemîn salvegera qetilkirina Mamoste Şemal de em dibêjin em ê kar û xebatên te bidomînin. Em ê wan destên ku bûne sedema şehîdkirina hevalên me jê bikin.
Mamoste Şemal ne tenê hevalek bû, her wiha dîroknasek û erdnîgarînasekî jêhatî jî bû. Rewşenbîrekî xwedî qelem bû, her tiştê ku bi qelema xwe dinivîsî, eşkerekirina rastiyan bû. Mamoste Şemal gerokê heqîqetê bû, her dem li pey rastiyan bû da ku dîroka Kurdistanê û herêmê rast bike. Di dema jiyana xwe de karî der barê dîroka Kifrî û Germiyan, jenosîd û Enfalê de gelek pirtûkan binivîse û çap bike.”
Cuma Kerîm her wiha got: “Mamoste Şemal bi qasî 30 salî xebatên siyasî kirine, fikr û felsefeya Mamoste Şemal fikr û felsefeya Rêber Apo bû, ev yek jî bû sedem ku bandorê li ser malbat û hevalên xwe bike.
Di Partiya Çareseriya Demokratîk a Kurdistanê karî bibe endamê rêveberiya wê û di desteya damezrîner a Tevgera Azadiya Kurdistanê de cih digirt.”
Cuma Kerîm di berdewamiya axaftina xwe de diyar kir ku karkirina bi Mamoste Şemal re gelek rehet bûye, ji ber ku kesekî jêhatî bûye û wiha domand: “Di nav gel û bajarê Kifriyê de Mamoste Şemal gelek dihat hezkirin, hezkirineke mezin di nav pêkhateyên curbecur ên Kifriyê de li hember wî hebû.
Armanckirina Mamoste Şemal ji aliyê dijmin ve vedigere wê yekê ku ew xwedî qelemeke azad bû. Mamoste Şemal di 28’ê Tebaxa 2022’an de li ber mala xwe hate şehîdkirin.”
Cuma Kerîm di dawiya axaftina xwe de bang li gel û hevalên Mamoste Şemal kir ku xebata Mamoste Şemal bidomînin û got: “Ez daxwazê ji gelê başûrê Kurdistanê û bi taybetî ji gelê Germiyanê dikim ku bidin ser rê û têkoşîna Mamoste Şemal, ji ber ku ew tekane rê û rêbaza heqîqetê ye ji bo Rojhilata Navîn û ji bo azadbûnê.
Her wiha di van rojên dawî de me dît ku du rojnamegerên jin ji aliyê dewleta Tirk ve hatin armanckirin û şehîd bûn, em vê kiryarê şermezar dikin. Ev yek ji me re dibêje ku dewleta Tirk çi rojnameger be, çi siyasetmedar be ferq nake, dike armanc. Pêwîst e gel û hikûmeta Iraqê li hember van kiryarên terorîstî yên dewleta Tirk dengê xwe derxin.”
