Fermandarê Giştî yê QSD’ê Mazlûm Ebdî, di hevpeyvîneke xwe ya li gel Aryen TV’yê de behsa zêdebûna gefên DAÎŞ’ê, diyaloga li gel hikûmeta Şamê, danûstandinên entegrasyonê di çarçoveya Peymana 10’ê Adarê de, vegera koçberan û siberoja QSD’ê nirxandinên berfireh kirin.
PIRSGIRÊKA SÎSTEM Û ZÎHNIYETÊ DIDOME
Mazlûm Ebdî, diyar kir ku li Sûriyeyê hê guhertineke bingehîn a zîhniyetê pêk nehatiye û destnîşan kir ku hişmendiya navendparêz a ku ji rejîma Baas’ê weke mîrate maye, hebûna xwe didomîne. Ebdî got, “Hê jî tê xwestin Sûriye ji aliyê komekê ve were birêvebirin. Pirsgirêkên Durziyan nehatine çareserkirin, li herêmên ku Elewî lê dijîn komkujî pêk hatin. Hevdîtin hene, lê pêşketin nîne.”
‘HÊZÊN KU NAXWAZIN ÇARESERÎ ÇÊBIBE HENE’
Ebdî, anî ziman ku di nava rêveberiya Şamê de hin kom hene ku çareseriyê naxwazin û got ku bi taybetî komên berê bi Tirkiyeyê re xebitîne û herêmên mîna Efrîn, Ezaz dagir kirine hewl didin pêvajoyê sabote bikin. Ebdî got ku ev kom bûne beşek ji dewletê û helwesteke êrîşkar li dijî QSD’ê nîşan didin.
PEYMANA 10’Ê ADARÊ Û AGIRBEST
Ebdî, behsa nîqaşên li ser pêkhatina Peymana 10’ê Adarê heta dawiya salê kir û destnîşan ev yek nayê wateya ku her tişt wê di vê dîrokê de bidawî bibe. Ebdî, anî ziman ku serketina herî girîng a peymanê agirbest e û got, “Agirbest hê jî didome û ev yek ji bo gelê Sûriyeyê gelekî girîng e. Diyalog di hawirdoreke bê şer de mimkun e.”
DIYALOGA BI ŞAMÊ RE DEWAM DIKE
Ebdî, da zanîn ku diyaloga li gel rayedarên hikûmeta Şamê bê navber didome û got ku hem artêş û hem jî Wezareta Karên Derve yê DYE’ê di vê pêvajoyê de cih girtine. Ebdî, da xuyakirin ku her çend carnan hevdîtin giran pêk hatibin jî, bi temamî qut nebûne.
ENTEGRASYON: ‘EM BI HEV RE AVA BIKIN’
Ebdî, li ser entegrasyona QSD’ê ya di nava artêşa Sûriyeyê de jî got ku divê ev pêvajo ne li ser esasê tasfiyekirinê li ser esasê avakirina hevpar be. Ebdî got, “’QSD’ê artêşeke bihêz e. Di nava Wezareta Parastinê de em dixwazin bi hev re artêşeke nû ji bo Sûriyeyê ava bikin. Divê QSD’ê di vê avahiyê de roleke girîng bilîze.” Ebdî, her wiha anî ziman ku rêveberiya Şamê ji ber berpirsyariyên navnetewî neçare ku biguhere.
YPJ XETA ME YA SOR E
Ebdî, bal kişand ser statuya taybet a YPJ’ê û destnîşan kir ku artêşbûna jin di têkoşîna li dijî DAÎŞ’ê û di qada civakî de roleke diyarker dilîze. Ebdî, da zanîn ku pêşniyara QSD’ê ew e ku YPJ’ê weke tabûreke xweser di nava artêşa Sûriyeyê de xwe birêxistin bike û got, “Ger ev pêşniyar neyê qebûlkirin, entegrasyon wê zehmet be. Destketiyên jinan ji bo me xeta sor e.”
PÊŞNIYARA LI DIJÎ DAÎŞ’Ê HÊZEK HEVPAR BÊ AVAKIRIN HAT KIRIN
Ebdî, behsa êrîşa li Palmîrayê ya li dijî leşkerên DYE’yê jî kir û got ku ev yek cidiyeta gefa DAÎŞ’ê nîşan dide. Ebdî got, “Bûyera Palmîrayê; nîşan da ku DAÎŞ hîna jî heye û xwe jinûvebirêxistin dike, bi taybetî li rojavayê Çemê Firatê.” Mazlûm Ebdî, diyar kir ku wan pêşniyar kiriye ku li dijî DAÎŞ’ê bi koordînasyona rêveberiya Şamê, koalîsyona navneteweyî û QSD’ê hêzek leşkerî ya hevpar bê avakirin.
EFRÎN Û HERÊMÊN DIN ÊN DAGIRKIRÎ
Ebdî, behsa plana xwe ya ji bo vegera koçberan kir û got, “Ji bo ku gelê Efrînê, Serê Kaniyê û Girê Spî vegerin, me planeke taybet amade kiriye û em dixebitin ku pirsgirêkên têkildarî vê vegerê çareser bikin, ku ev yek pêdivî bi erêkirina aliyê Tirkiyeyê di hevkariya bi Hikûmeta Şamê û hêzên navneteweyî re heye û em li ser vê bingehê dixebitin. Em hêvî dikin ku vegera xelkên Efrînê bi awayekî birêxistinkirî û bi kom dest pê bike.”
KAMPA HOL Û DAÎŞ’Î
Ebdî, têkildarê mijara kampên DAÎŞ’ê û bi taybetî kampa Holê wiha got, “Me kariye em pirsgirêkên nîvê niştecihên wê çareser bikin, ku hinek ji wan vegeriyane herêmên xwe yên li rojavayê Çemê Firatê. Em bi Hikûmetê re dixebitin da ku planekê ji bo vegera yên mayî pêk bînin, her wih hevdîtina me ya bi Iraqê re jî berdewam e.”
‘SALA 2026’AN DÊ BIBE SALA SERKETINÊN NÛ’
Ebdî, di nirxandina xwe ya têkildarê sala nû de bal kişand ser nîqaşên li ser siberoja QSD’ê û got, “Sala 2026’an dê ji bo me bibe destpêkeke nû. Hewldanên me hene û em ê wan bixin pratîkê. Di sala nû de em ê serketinên girîng bidest bixin.”
