Parlamenterê Partiya DEVA’yê û endamê Komîsyona Demokrasî, Xweşik-Biratî û Hevgirtina Milî Mehmet Emîn Ekmen di civînê de axivî û bal kişand ser gavên pêwîst ên ji bo çareseriyeke demokratîk a pirsgirêka Kurd bên avêtin. Ekmen diyar kir ku hemû endamên komîsyonê ji bo Tirkiyeyek bê tundî tevdigerin û anî ziman ku ew piştgiriyê didin vê yekê.
Ekmen destnîşan kir ku tevî raman û îdeolojiyên wan cuda ne jî, ew li ser xalên hevpar hatine gel hev û got, “Dema ku em li pêvajoya avakirina komîsyonê dinêrin, em dibînin ku hikûmet û saziyên dewletê ji bo pêvajoyê pêşiya nîqaşên rêziknameyên qanûnî yên pêwîst vekirin. Rêziknameyên qanûnî ji bo pêvajoyê girîng in. Pêwîstiya civakê ew e ku hem dewleta hiqûqê hem jî di pêkanînê wê de divê qadên asayîkirin, demokratîkbûn û azadiyê bên mîsogerkirin.”
BAL KIŞANDIN SER PEYAMA RÊBER APO
Ekmen anî ziman ku divê komîsyon derbarê rêziknameyên qanûnî û daxwazên demokratîk de bi yekdengî tevbigerin û wiha domand: “Ev ne pêvajoyek çareseriyê ye. Di avakirina vê pêvajoyê de ya girîng aştî ye. Omer Ocalan piştî hevdîtina li Îmraliyê got, ‘Ger derfet bê dayîn, ez dikarim vê mijarê ji çek û tundiyê veguhezînim zemîna hiqûq, siyaset û demokrasiyê’. Ji bo me ya sereke bêçekbûn û vegera malê ye. Divê em li ser pirsgirêkên sedsalî yên komarê, demokratîkbûn û reformên binyadî û destûrî jî rawestin.”
‘EM ASTENG NAKIN, HÊSAN DIKIN’
Ekmen wiha berdewam kir: “Wextê erka komîsyonê diyar e. Di vê demê de zehmetiyên nîqaşkirina çareseriya pirsgirêkan hene. Pêşniyarek min ji bo AKP’ê heye: Ger gavên mîna paketa demokratîkbûnê ya mezin a ku di 2013’an de hate ragihandin berdewam bikin û daxwazên ji bo demokratîkbûnê bi yekalî neyên astengkirin, motîvasyona di nav komîsyonê de wê bi hêsanî pêk were. Em hêvî dikin ku hikûmet bi awayekî erênîtir nêzî pêvajoyê bibe. Astengiyên weke ‘Ev nabe, ew nabe’ datînin pêşiya me û ev astengî çareseriyê zehmetir dike. Em asteng nakin; em hêsan dikin. Divê hikûmet vê yekê fam bike.”
CHP’Ê DAXWAZA GUHDARKIRINA MEXDÛRAN KIR
Parlamenterê CHP’ê Sezgîn Tanrikulu jî diyar kir ku ji bo pisgirêk bibe civakî divê Meclis nîqaşan bîne ber komîsyonê. Tanrikulu anî ziman ku pirsgirêka Kurd dîrokî ye û divê kesên ku di dema şer de êş kişandine li Meclisê bên guhdarkirin û destnîşan kir ku ev yek wê baweriya bi pêvajoyê re zêdetir bike. Tanrikulu got, “Divê em pêşî bernameyek xebatê deynin pêşiya xwe. Divê em kesên ku guhdar bikin diyar bikin.”
Tanrikulu anî ziman ku divê ew malbatên Ugur Kaymaz, Ceylan Onkol, Eren Bulbul û Dayikên/Mirovên Şemiyê û dayikên ku li Diyarbakirê di çalakiya rûniştinê de ne bên guhdarkirin.
