Platforma Konfederasyona Sendîkayên Karkerên Cameweriyê (KESK) ji bo kesên bi Biryarnameyên di Hukmê Qanûnê de (KHK) ji karên xwe hatine derxistin dîsa vegerin ser karê xwe, ji Amedê ber bi Enqereyê ve meş da destpêkirin. Endamên KESK’ê yên ku meşa xwe di 13’yê Cotmehê de piştî daxuyaniya li ber Edliyeya Amedê dabûn despêkirin, gihîştin Edeneyê. Meşvanên KESK’ê li pêşiya Gara Edeneyê ji aliyê nûnerên partiyên siyasî û rêxistinên civakî ve hatin pêşwazîkirin. Endamên KESK’ê û yên hatibûn pêşwaziya wan ji Garê ber bi Parka Ataturk ve meşiyan. Di meşê de dirûşmên “Heq, hiqûq û edalet dê bi têkoşînê bê bidestxistin”, “Bijî berxwedana kedkaran” û “Jin, jiyan, azadî” hatin berzkirin.
Hevseroka Sendîkaya Kedkarên Tenduristî û Xizmetên Civakî (SES) ya Edeneyê Şukran Guzel, daxuyanî xwend û got: “KHK şerma herî mezin a vî welatî ye. Bêdengkirina kedkaran û rêxistina wan hatiye hedefgirtin; lê em bêdeng nebûn em ê bêdeng nemînin.”
Şukran Guzelê, diyar kir ku îxraçkirina bi KHK’ê polîtîkaya “kuştina sivîl” e û wiha domand: “OHAL xilas bû, lêbelê bêhiqûqî didome. Bi salan e komîsyon edaletê dereng dixîne. Gelek mirov bi yek îmzeyekî ve ji jiyana xwe bûn.”
Şukran Guzelê, xwest ku KHK bên betalkirin, xebatkarên cemaweriyê vegerin ser karên xwe, Komîsyona OHAL’ê bê fesixkirin û pêvajoyeke adilane ya darazê dest pê bike.
Piştî daxuyaniyê meşvan ber bi Mersînê ve ketin rê.
