Tevgera Jinên Azad (TJA), di çarçoveya 8’ê Adarê Roja Jinên Cîhanê de li navçeya Şahînbey a Dîlokê meş lidarxist. Berdevka Meclisa Jinan a Partiya Wekhevî û Demokrasiyê ya Gelan (DEM Partî) Halîde Turkoglu û gelek jin beşdarî meşê bûn. Meş ji avahiya Rêxistina DEM Partiyê ya navçeyê dest pê kir, heta Parka Cengîz Topelê berdewam kir. Di meşê de jinan dirûşma “Em ê jiyana azad û wekhev dihûnin” û “Jin jiyan azadî” berzkirin û pankarta “Bi berxwedanê jiyaneke azad û wekhev dihûnin” vekirin.
Piştî meşê Halîde Turkoglu axivî û bal kişand ser dîroka 8’ê Adarê û got: “Bi sedsalan e, têkoşîna jinan li van axan bi serhildana li dijî pergalên ku ji hêla mêran ve tên serdestkirin mezin bûye. Ji ber ku em dizanin ku di cîhanek ku ji hêla mêran ve tê serdestkirin de, mafê jiyanê ji jinan re tê înkarkirin û keda wan tê binpêkirin. Mixabin, li van herêman, di şerde de bedena jinan hedef tên girtin. Ji ber ku bi sedsalan e, me li kolan û meydanan gotiye, ‘Dema ku jin azad bibin, civak jî dê azad bibe’.
Em jin ji têkoşîna xwe bawer dikin, em ji têkoşîna xwe bawer dikin. Em bi rêxistinbûna li dora vê têkoşînê hêviya aştiyê ava dikin. Em dizanin ku çi dibe bila bibe, em jin dê jiyana wekhev û azad a ku em xeyal dikin bi dest bixin. Em ê bi têkoşîna jinan wê komara demokratîk ava bikin ku mirov tê de bi wekhevî û azad bi hev re bijîn, li vî welatî bi hev re.”
Çalakî piştî daxuyaniyê bi dawî bû.
